കോവിഡില്‍ കരുതലായി നമ്മുടെ ആനവണ്ടി

നഷ്ടത്തിന്റെ കണക്കില്‍ സ്വകാര്യ ബസുകള്‍ ഓട്ടം നിര്‍ത്തിയപ്പോള്‍ ഗ്രാമീണ കേരളത്തിന് താങ്ങാവുകയാണ് മലയാളിയുടെ പ്രീയപ്പെട്ട ആനവണ്ടി. ശമ്പളം പോലും മുറയ്ക്ക് ലഭിക്കാത്തതിന്റെ സങ്കടമുണ്ടെങ്കിലും കോവിഡ് കാലത്ത് ജനങ്ങള്‍ക്ക് വേണ്ടി സേവനസന്നദ്ധരായി രംഗത്തുണ്ട് കെ എസ് ആര്‍ ടി സി . സംസ്ഥാന സര്‍ക്കാരിന്റെ നിര്‍ദേശ അനുസരണമാണ് പുതിയ ചുമതല ഏറ്റെടുത്തിരിക്കുന്നത്. നഷ്ടം സഹിച്ചും, യാത്രക്കാരെ പെരുവഴിയില്‍ നിര്‍ത്താതെ മലയാളിയുടെ പ്രിയപ്പെട്ട ആനവണ്ടി യാത്ര തുടരുകയാണ്. ഒരു ഡിപ്പോയുടെ കാര്യമെടുത്താല്‍ കഴിഞ്ഞ മാസം ഇന്ധനച്ചെലവു കഴിഞ്ഞാല്‍ ഏകദേശം 36,000 രൂപ മാത്രമാണ് സമ്പാദ്യം. 16.35 ലക്ഷം രൂപ വരുമാനം കിട്ടിയപ്പോള്‍ ഇന്ധനച്ചെലവ് 15.99 ലക്ഷം രൂപയായി. 312 ജീവനക്കാരുടെ ശമ്പളവും ബസുകളുടെ അറ്റകുറ്റപ്പണികളും കൂടി പരിഗണിച്ചാല്‍ നഷ്ടക്കണക്ക് കൂടും. പ്രതിദിനം 6 ലക്ഷത്തോളം രൂപ വരുമാനവുമായി ടോപ് ഗിയറില്‍ കുതിക്കുമ്പോഴാണ് പല ഡിപ്പോകളിലും കോവിഡും ലോക് ഡൗണും വന്നത്. അതോടെ റിവേഴ്‌സ് ഗിയറിലായി ഡിപ്പോയുടെ ഓട്ടം. നിയന്ത്രണങ്ങളില്‍ ഇളവുവന്ന് സര്‍വീസ് തുടങ്ങിയപ്പോഴാകട്ടെ യാത്രക്കാര്‍ തീരെയില്ല. കോവിഡ് ഭീതി ഭൂരിഭാഗം യാത്രക്കാരെ അകറ്റിനിര്‍ത്തിയപ്പോഴും കാത്തുനില്‍ക്കുന്ന ഒരു യാത്രക്കാരനെങ്കിലും ഉണ്ടെങ്കില്‍ യാത്ര തുടരാനായിരുന്നു കെഎസ്ആര്‍ടിസി തീരുമാനം. യാത്രക്കാരുടെ ഡിമാന്‍ഡ് അനുസരിച്ച് ഓരോ ദിവസവുമുള്ള സര്‍വീസുകളുടെ എണ്ണത്തില്‍ മാറ്റം വരും. യാത്രക്കാര്‍ കൂടുതലുള്ള സമയം തിരഞ്ഞെടുത്തും സര്‍വീസുകള്‍ നടത്തുന്നുണ്ട്. പൊതുജനങ്ങള്‍ക്കുള്ള സര്‍വീസുകള്‍ക്കു പുറമേ പ്രവാസികളെ വീടുകളിലെത്തിക്കാനായി ബസുകള്‍ വിമാനത്താവളങ്ങളില്‍നിന്നും കെഎസ്ആര്‍ടിസി ഓടിക്കുന്നു. നഷ്ടം താങ്ങാനാകാതെ സ്വകാര്യ ബസുകള്‍ ഉള്‍പ്പെടെ സര്‍വീസ് നിര്‍ത്തിവച്ചിട്ടും കോവിഡ് ഭീഷണിക്കിടയിലും യാത്രക്കാരെ കൈവിടാതെ മാതൃകാസേവനം കാഴ്ചവയ്ക്കുകയാണ് ആനവണ്ടിയും അതിലെ ജീവനക്കാരും.