ബെയ്റൂട്ട് സ്ഫോടനം ആക്രമണ സാധ്യത തള്ളാതെ യു എസ്

ബെയ്റൂട്ട്  നഗരത്തിന്റെ പകുതിയോളം തകർത്ത സ്ഫോടനം ആക്രമണമാകാനുള്ള സാധ്യത പൂർണമായി തള്ളിക്കളഞ്ഞിട്ടില്ലെന്ന് യുഎസ്. ഇതു സംബന്ധിച്ച ഇന്റലിജൻസ് വിവരങ്ങൾ ശേഖരിച്ചുവരികയാണെന്നു വൈറ്റ് ഹൗസ് ചീഫ് ഓഫ് സ്റ്റാഫ് മാർക് മെഡോസ് പറഞ്ഞു. ബെയ്റൂട്ടിലേതു ബോംബ് സ്ഫോടനമാകാൻ സാധ്യതയുണ്ടെന്നു യുഎസ് പ്രസിഡന്റ് ഡോണൾഡ് ട്രംപ് പറഞ്ഞിരുന്നു. രാജ്യാന്തര അന്വേഷണം വേണമെന്ന് ആംനസ്റ്റി ഇന്റർനാഷനലും ആവശ്യപ്പെട്ടു. തുറമുഖത്തു സൂക്ഷിച്ചിരുന്ന അമോണിയം നൈട്രേറ്റ് ശേഖരത്തിനു തീപിടിച്ചാണു ചൊവ്വാഴ്ച സ്ഫോടനമുണ്ടായത്. സ്ഫോടനത്തിൽ 1500 കോടി ഡോളറിന്റെ നാശനഷ്ടം സംഭവിച്ചതായാണു പ്രാഥമിക കണക്ക്. തുറമുഖനഗരം പുനർനിർമിക്കാനുള്ള സഹായങ്ങൾ അഴിമതിക്കാരുടെ കൈകളിൽ എത്തില്ലെന്ന് ഉറപ്പുവരുത്തുമെന്ന് ഫ്രഞ്ച് പ്രസിഡന്റ് പറഞ്ഞു. തുറമുഖം സന്ദർശിച്ച മക്രോയെ വരവേറ്റ ജനക്കൂട്ടം, സർക്കാരിനെതിരെ മുദ്രാവാക്യം ഉയർത്തി. ∙കാണാതായവർക്കുവേണ്ടി കെട്ടിടാവശിഷ്ടങ്ങൾക്കിടയിൽ തിരച്ചിൽ തുടരുന്നതിനിടെ, രക്ഷാപ്രവർത്തകരുടെ വിദഗ്ധസംഘവുമായി ഫ്രഞ്ച് പ്രസിഡന്റ് ഇമ്മാനുവൽ മക്രോ ലബനനിലെത്തി. സ്ഫോടനത്തിൽ മരിച്ചവരുടെ എണ്ണം 145 ആയി ഉയർന്നു. 5000 പേർക്കു പരുക്കേറ്റു. വീടുകൾ നഷ്ടമായ ലക്ഷക്കണക്കിനാളുകൾ പെരുവഴിയിലാണ്. ലബനനിൽ രാഷ്ട്രീയമാറ്റം ആവശ്യമാണെന്നും മക്രോ പറഞ്ഞു. സഹായധനം സമാഹരിക്കുമെന്ന് ലോക ബാങ്ക് വ്യക്തമാക്കി. ഇറാഖ്, ഓസ്ട്രേലിയ, ജർമനി, യുകെ എന്നിവ അടക്കം രാജ്യങ്ങളും സഹായവാഗ്ദാനങ്ങൾ നൽകിയിട്ടുണ്ട്.