നേപ്പാളുവഴിയും സ്വര്‍ണകടത്ത് ലീഗിനു യു ഡി എഫിനു വെല്ലുവിളി

തിരുവനന്തപുരം സ്വര്‍ണകടത്ത് കേസിലെ രാഷ്ട്രീയ ബന്ധങ്ങള്‍ പുറത്തുവന്നതിന്റെ മാനക്കേട് മാറുന്നതിന് മുന്‍പ് നേപ്പാള്‍ ഴിയുള്ള കള്ളക്കടത്തില്‍ ലീഗ് നേതാവിന് ബനധമുണ്ടെന്ന വാര്‍ത്ത പുതിയ തലവേദനയാകുന്നു. സ്വര്‍ണക്കടത്ത് കേസില്‍ പ്രാദേശിക മുസ്ലിംലീഗ് നേതാവിനെ പ്രതിക്കൂട്ടിലാക്കി നേപ്പാളിലെ കാഠ്മണ്ഠു ജയിലില്‍ കഴിയുന്നവരുടെ കത്താണ് പുറത്തുവന്നിരിക്കുന്നത്. തിരൂരങ്ങാടി പഞ്ചായത്ത് മുന്‍ അംഗവും ലീഗ് നേതാവുമായ അബ്ദുള്‍ റസാഖ് ഹാജിക്കെതിരെ നടപടി ആവശ്യപ്പെട്ടാണ് ജയിലില്‍ കഴിയുന്ന വൈപ്പിന്‍പാടത്ത് ജലാലുദ്ദീന്‍, മലപ്പുറം എടവണ്ണ ചോലയില്‍ അര്‍ഷാദ് എന്നിവര്‍ മുഖ്യമന്ത്രിക്ക് കത്തയച്ചത്. റസാഖ് ഹാജിക്കുവേണ്ടിയാണ് സ്വര്‍ണം കടത്തിയതെന്ന് കത്തില്‍ പറയുന്നു. നിരവധി തവണ സ്വര്‍ണം കടത്തിയിട്ടുണ്ട്. ഹാജിയുടെ മകന്റെ പേരില്‍ ഗള്‍ഫിലുള്ള ഫ്‌ലാറ്റില്‍നിന്നാണ് സ്വര്‍ണം ലഭിച്ചത്. ആദ്യതവണ ഹാജിയുടെ വീട്ടിലാണ് സ്വര്‍ണമെത്തിച്ചത്. പിന്നീട് ഇയാളുടെ ഹോട്ടലിലുമെത്തിച്ചു. കാഠ്മണ്ഠുവില്‍ പിടിക്കപ്പെട്ടപ്പോള്‍ രക്ഷിക്കാമെന്ന് ഹാജി ഉറപ്പുനല്‍കി. വീട്ടുകാരെയും ഇക്കാര്യം അറിയിച്ചു. ജയിലില്‍നിന്ന് നിരവധി തവണ ഫോണില്‍ ബന്ധപ്പെട്ടു. എന്നാല്‍, പിന്നീട് തിരിഞ്ഞുനോക്കിയില്ല. അബ്ദുള്‍ റസാഖ് ഹാജിയുടെ സിം കാര്‍ഡ് വിവരങ്ങളടക്കം തങ്ങളുടെ കൈവശമുണ്ടെന്നും കത്തിലുണ്ട്. സ്വര്‍ണം കടത്തിയവരുടെ പേരുവിവരങ്ങളും കത്തിലുണ്ട്. കേരളത്തിലെ വിമാനത്താവളങ്ങളില്‍ നിരവധി തവണ ഇതില്‍ പലരും പിടിക്കപ്പെട്ടെങ്കിലും രാഷ്ട്രീയ സ്വാധീനം ഉപയോഗിച്ച് കേസ് ഒതുക്കുകയായിരുന്നു. നേപ്പാള്‍ ജയിലില്‍നിന്ന് ശിക്ഷ കഴിഞ്ഞ് പുറത്തിറങ്ങിയയാള്‍ മുഖേനയാണ് മുഖ്യമന്ത്രിക്കുള്ള കത്ത് പ്രതികള്‍ വീട്ടിലേക്കെത്തിച്ചത്. എന്നാല്‍ സമ്മര്‍ദത്തിനു വഴങ്ങി പ്രതികളുടെ വീട്ടുകാര്‍ കത്ത് മുഖ്യമന്ത്രിക്ക് നല്‍കിയിരുന്നില്ല. ഈ കത്താണ് ഇപ്പോള്‍ പുറത്തായത്. ദേശാഭിമാനിയാണ് ഇത് സംബന്ധിച്ച വാര്‍ത്ത പുത്തുവിട്ടിരിക്കുന്നത്. ഇതുവരെ ലീഗ് നേതൃത്വമോ, യു ഡി എഫോ ഇത് നിഷേധിച്ചിട്ടില്ല. സ്വര്‍ണക്കടത്തില്‍ തനിക്ക് ബന്ധമില്ലെന്നും ജോലിക്കുവേണ്ടിയാണ് ഇവരെ കൊണ്ടുപോയതെന്നും അബ്ദുള്‍ റസാഖ് ഹാജി പറഞ്ഞു.