1600 പേരിലാണു ഓക്സ്ഫഡ് വാക്സിൻ

ഓക്സ്ഫഡ് സർവകലാശാലയുടെ സാധ്യതാ വാക്സിൻ പരീക്ഷണാടിസ്ഥാനത്തിൽ നൽകുന്നതു 18 വയസ്സിനു മുകളിലുള്ളവർക്കു മാത്രം. 28 ദിവസത്തെ ഇടവേളയിൽ 2 ഡോസ് ആണ് നൽകുക. ആദ്യ ഡോസ് നൽകി, അടുത്തത് 29–ാം ദിവസം. ഇന്ത്യയിൽ ഇതിനു നിർമാണക്കരാറുള്ള സിറം ഇൻസ്റ്റിറ്റ്യൂട്ട് മനുഷ്യരിലെ പരീക്ഷണത്തിനായി സമർപ്പിച്ച ‌ട്രയൽ നടപടിക്രമങ്ങളിലാണ് ഇക്കാര്യമുള്ളത്. തുടർന്നു നിശ്ചിത ഇടവേളയിൽ വാക്സിന്റെ സുരക്ഷയെക്കുറിച്ചും പ്രതിരോധശക്തിയെക്കുറിച്ചും വിശദമായ പഠനം നടത്തും. അതേസമയം, ആദ്യ രണ്ടു ഘട്ട പരീക്ഷണത്തിലുള്ള ഭാരത് ബയോടെക്കിന്റെ കോവാക്സിൻ, 14 ദിവസത്തെ ഇടവേളയിലാണു വൊളന്റിയർമാരിൽ പരീക്ഷിക്കുന്നത്. രണ്ടാംഘട്ടത്തിൽ 12നും 65നും ഇടയിൽ പ്രായമുള്ള 750 പേരാണ് കോവാക്സിൻ സ്വീകരിക്കുക. നേരത്തെ, വാക്സിൻ പരീക്ഷണവുമായി ബന്ധപ്പെട്ടു സിറം ഇൻസ്റ്റിറ്റ്യൂട്ട് സമർപ്പിച്ച റിപ്പോർട്ടിൽ മാറ്റങ്ങൾക്കു സയന്റിഫിക് എക്സ്പെർട് കമ്മിറ്റി നിർദേശിച്ചിരുന്നു. പരിഷ്കരിച്ചു സമർപ്പിച്ച റിപ്പോർട്ടിന്റെ അടിസ്ഥാനത്തിലാണ് 2, 3 ഘട്ട ട്രയലുകൾ രാജ്യത്തു നടത്താൻ ഡ്രഗ്സ് കൺട്രോളർ ജനറൽ ഓഫ് ഇന്ത്യ അംഗീകാരം നൽകിയത്. ഇന്ത്യയിലെ 17 ആശുപത്രികളിലായി 1600 പേരിലാണു ഓക്സ്ഫഡ് വാക്സിൻ നൽകുക. വാക്സിന്റെ മൂന്നാം ഘട്ട പരീക്ഷണം യുകെ, ബ്രസീൽ എന്നിവിടങ്ങളിൽ പുരോഗമിക്കുകയാണ്.