പഞ്ചായത്ത് തിരഞ്ഞെടുപ്പ് പരിശീലനം ഓണ്‍ലൈനില്‍

തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതുതിരഞ്ഞെടുപ്പിന്റെ നടത്തിപ്പിന് തീരുമാനമായെങ്കിലും കടക്കാനുള്ളത് വന്‍ കടമ്പകള്‍. ഒന്നര ലക്ഷം ഉദ്യോഗസ്ഥരെ എങ്കിലും തിരഞ്ഞെടുപ്പ് നടത്താന്‍ വേണ്ടി വരും. ഇവരില്‍ തിരഞ്ഞെടുപ്പു പ്രക്രിയയില്‍ നേരിട്ടു പങ്കാളികളാകുന്നവരുടെ പരിശീലനം എങ്ങനെ നടത്തും എന്നതും പ്രശ്‌നമാണ്.     വരണാധികാരികള്‍ ഉള്‍പ്പെടെയുള്ളവരുടെ പരിശീലനത്തിന്റെ ഷെഡ്യൂള്‍ മുന്‍പു സംസ്ഥാന തിരഞ്ഞെടുപ്പ് കമ്മിഷന്‍ തയാറാക്കിയിരുന്നുവെങ്കിലും കോവിഡ് പ്രതിസന്ധി മൂലം ഇത് മാറ്റി. സമയബന്ധിതമായി തിരഞ്ഞെടുപ്പു നടത്തണമെങ്കില്‍ പരിശീലനം ഈ മാസം ആരംഭിക്കണം. തിരഞ്ഞെടുപ്പ് ചട്ടങ്ങളെയും മാര്‍ഗനിര്‍ദേശങ്ങളെയും സംബന്ധിക്കുന്നതാണു പരിശീലനം. ആദ്യമായി മാസ്റ്റര്‍ ട്രെയിനര്‍മാര്‍ക്കാണ് ഇതു നല്‍കേണ്ടത്. ഇവരാണു മറ്റുള്ളവര്‍ക്കു പരിശീലനം നല്‍കുന്നത്. മാസ്റ്റര്‍ ട്രെയിനര്‍മാര്‍ക്കുള്ള പരിശീലനം ഓണ്‍ലൈന്‍ വഴി നടത്താനാണു തിരഞ്ഞെടുപ്പ് കമ്മിഷന്‍ ഇപ്പോള്‍ ആലോചിക്കുന്നത്. സാമൂഹിക അകലം പാലിക്കേണ്ടതിന്റെ ഭാഗമായി, വരണാധികാരികളെയും മറ്റ് ഉദ്യോഗസ്ഥരെയും ചെറുസംഘങ്ങളായി തിരിച്ചു പല ദിവസങ്ങളിലായി പരിശീലനം സജ്ജീകരിക്കാനാണു പരിപാടി. തദ്ദേശസ്ഥാപനങ്ങളിലെ ജീവനക്കാര്‍ കോവിഡ് പ്രതിരോധ പ്രവര്‍ത്തനങ്ങളില്‍ സജീവമായതിനാല്‍ ഇപ്പോള്‍ പരിശീലനത്തിനു വിളിക്കുന്നതും എങ്ങനെ എന്ന് സംശയമാണ്. അതേസമയം, തിരഞ്ഞെടുപ്പ് ആവശ്യത്തിനായുള്ള വിവിധ അപേക്ഷ ഫോമുകള്‍, മാര്‍ഗനിര്‍ദേശങ്ങള്‍ അടങ്ങിയ ലഘുലേഖകള്‍ തുടങ്ങിവയുടെ അച്ചടിക്കായി തിരഞ്ഞെടുപ്പ് കമ്മിഷന്‍ ഓര്‍ഡര്‍ നല്‍കി. സര്‍ക്കാര്‍ പ്രസുകളിലാണ് അച്ചടിയുടെ ഭൂരിഭാഗവും നിര്‍വഹിക്കുക. കോവിഡ് കാലമായതിനാല്‍, പ്രസുകളില്‍ ജീവനക്കാരുടെ കുറവു മൂലം അച്ചടി വൈകാതിരിക്കാനുള്ള നടപടി തുടങ്ങി.