രാജസ്ഥാൻ ഓഗസ്റ്റ് 14 മുതൽ നിയമസഭാ സമ്മേളനം

  രാജസ്ഥാനിലെ സർക്കാർ- ഗവർണർ പോരാട്ടത്തിന് അവസാനം. ഓഗസ്റ്റ് 14 മുതൽ നിയമസഭാ സമ്മേളനം ചേരാനുള്ള സർക്കാർ ശുപാർശ ഗവർണർ കൽരാജ് മിശ്ര അംഗീകരിച്ചു. സഭാ സമ്മേളനം വിളിക്കണമെന്ന മന്ത്രിസഭയുടെ നിർദേശം മൂന്നു തവണ മടക്കിയ ശേഷമാണ് ഇപ്പോൾ അനുരഞ്ജനമായത്. സർക്കാരിനു വിശ്വാസം തേടാനാണെങ്കിൽ മാത്രം ഉടൻ സഭ ചേരാമെന്നും അല്ലെങ്കിൽ 21 ദിവസത്തെ നോട്ടീസ് വേണമെന്നുമാണ് ഗവർണർ നിലപാടു സ്വീകരിച്ചിരുന്നത്. ഈ നിലപാടിന് ഒടുവിൽ സർക്കാർ വഴങ്ങി. നിയമസഭ വിളിക്കാൻ ആദ്യ തവണ ശുപാർശ നൽകിയ ജൂലൈ 23 മുതലുള്ള ദിവസം കണക്കാക്കിയാൽ 21 ദിവസം തികയുമെന്നു ചൂണ്ടിക്കാണിച്ചാണ് ഓഗസ്റ്റ് 14ന് സഭ ചേരാൻ ബുധനാഴ്ച പുതിയ നിർദേശം മന്ത്രിസഭ സമർപ്പിച്ചത്. രാത്രി വൈകി ഗവർണർ അത് അംഗീകരിക്കുകയായിരുന്നു. നേരത്തേ, ജൂലൈ 31ന് സഭ ചേരാനാണ് സർക്കാർ ആവശ്യപ്പെട്ടിരുന്നത്. വളരെ അടിയന്തരമായ കാര്യങ്ങൾക്കു മാത്രമേ ഷോർട്ട് നോട്ടീസിൽ സഭാ സമ്മേളനം വിളിക്കാനാവൂ എന്നതായിരുന്നു ഗവർണറുടെ നിലപാട്. മൂന്നാം തവണയും ഗവർണർ നിർദേശം മടക്കിയതിനെത്തുടർന്ന് ബുധനാഴ്ച മുഖ്യമന്ത്രി അശോക് ഗെഹ് ലോട്ട് ഗവർണറെ സന്ദർശിച്ചു ചർച്ച നടത്തിയിരുന്നു. 15 മിനിറ്റോളം ഇവർ തമ്മിലുള്ള കൂടിക്കാഴ്ച നീണ്ടു നിന്നു. ഇതിനു ശേഷമാണ് വൈകിട്ട് വീണ്ടും മന്ത്രിസഭ ചേർന്ന് പുതിയ ശുപാർശ തയാറാക്കിയത്. ഇതിനിടെ, നിയമസഭാ സ്പീക്കർ സി.പി. ജോഷിയും രാജ്ഭവനിലെത്തി ഗവർണറെ കണ്ടു. ജോഷിയുടെ ജന്മദിനം കൂടിയായിരുന്നു ഇന്നലെ. സൗഹൃദ സന്ദർശനം മാത്രമാണിതെന്നാണ് സ്പീക്കറുമായി ബന്ധപ്പെട്ട വൃത്തങ്ങൾ അവകാശപ്പെട്ടത്.