കസ്റ്റംസ് നീക്കങ്ങള്‍ നിര്‍ണ്ണായകം

സ്വര്‍ണക്കടത്ത് കേസ് അന്വേഷിക്കുന്ന കസ്റ്റംസ് സംഘം കോണ്‍സുലേറ്റിലെ അഡ്മിന്‍ അറ്റാഷെയെ നേരില്‍ കണ്ട് വിവരങ്ങള്‍ ശേഖരിച്ചു . ഇതിന്റെ അടിസ്ഥാനത്തില്‍ കൂടുതല്‍ കണ്ടത്തലുകളിലേക്ക് നീങ്ങിയിരിക്കുകയാണ് അന്വേഷണ സംഘം. അഡ്മിന്‍ അറ്റാഷെ അബ്ദുള്ള സെയ്ദ് അല്‍ഖത്താനിയില്‍നിന്നാണ് വിവരം ശേഖരിച്ചത്. അതിനുശേഷമാണ് അഡ്മിന്‍ അറ്റാഷെ യു എ ഇയിലേക്ക് മടങ്ങിയത്. മൂന്ന് ദിവസംമുമ്പാണ് മണക്കാട്ടുള്ള യുഎഇ കോണ്‍സുലേറ്റില്‍ കസ്റ്റംസ് സംഘം എത്തിയത്. ജീവനക്കാരോട് അഡ്മിന്‍ അറ്റാഷെയെ കാണണമെന്ന് അറിയിച്ചു. അദ്ദേഹം കോണ്‍സുലേറ്റിന് പുറത്തെത്തി ഉദ്യോഗസ്ഥരെ കണ്ടു. സ്വപ്ന, സരിത് എന്നിവരുടെ നിയമനം, കോണ്‍സുലേറ്റില്‍നിന്ന് മാറ്റാനുള്ള കാരണം, ഇതിനുശേഷവും ഇവര്‍ ഇവിടെ വരാനിടയായതും സരിത് ബാഗേജ് ഏറ്റുവാങ്ങാന്‍ പോകാനിടയാക്കിയതുമായ സാഹചര്യം, അറ്റാഷെയുടെ നാട്ടിലേക്കുള്ള മടക്കം തുടങ്ങിയ കാര്യങ്ങളാണ് രേഖപ്പെടുത്തിയത്. അഡ്മിന്‍ അറ്റാഷെയ്ക്ക് പകരമായി എത്തിയ യുഎഇ പൗരനായ ഉദ്യോഗസ്ഥന്‍ കോണ്‍സുലേറ്റില്‍ ചാര്‍ജെടുത്തില്ല. ശനിയാഴ്ച തലസ്ഥാനത്ത് എത്തിയ ഇയാള്‍ നഗരത്തിലെ ഫ്‌ലാറ്റിലാണുള്ളത്. ഇതിനിടെ കസ്റ്റംസ് അന്വേഷണം അവസാനഘട്ടത്തിലാണ്. യുഎഇ കോണ്‍സുലേറ്റിന്റെ നയതന്ത്ര ബാഗേജില്‍ സ്വര്‍ണം കടത്തി എന്നതുമാത്രമാണ് ഈ കേസിനുള്ള പ്രത്യേകതയെന്ന വിലയിരുത്തലിലാണ് കസ്റ്റംസ്. അന്വേഷണം 80 ശതമാനം പൂര്‍ത്തിയായതായി കസ്റ്റംസ് അധികൃതര്‍ പറഞ്ഞു. സ്വര്‍ണക്കടത്തും ഹവാല ഇടപാടുകളും പതിവായി നടത്തിവരുന്നവരാണ് ഇതുവരെ അറസ്റ്റിലായ പലരും. കഴിഞ്ഞ രണ്ടുവര്‍ഷത്തിനിടെ 1400 സ്വര്‍ണക്കടത്തുകള്‍ കസ്റ്റംസ് പിടികൂടി അന്വേഷിച്ചിട്ടുണ്ട്. എണ്ണൂറോളംപേരെ അറസ്റ്റ് ചെയ്തു. എന്നാല്‍, ഇത്രയും ആഴത്തില്‍ അന്വേഷിച്ച മറ്റൊരു കേസില്ല. നയതന്ത്ര ബാഗേജില്‍ സ്വര്‍ണം കടത്തി എന്നതും 30 കിലോ സ്വര്‍ണം ഒറ്റയടിക്ക് കൊണ്ടുവന്നു എന്നതുംതന്നെയാണ് കാരണം. കേസ് രാഷ്ട്രീയ വിവാദമായതും അന്വേഷണം വിപുലമാകാന്‍ കാരണമായി. കള്ളക്കടത്തുസ്വര്‍ണം എവിടെനിന്ന് വന്നു, അതിന് പണം മുടക്കിയത് ആര്, ആര്‍ക്കുവേണ്ടി കൊണ്ടുവന്നു, ഇടപാടിനുപിന്നില്‍ പ്രവര്‍ത്തിച്ച മറ്റുള്ളവര്‍ ആരൊക്കെ തുടങ്ങിയ കാര്യങ്ങളാണ് കസ്റ്റംസ് കൊച്ചി കമീഷണറേറ്റ് അന്വേഷിച്ചത്. അതിനുള്ള ഉത്തരങ്ങള്‍ ഇതുവരെയുള്ള അന്വേഷണത്തിലൂടെ കസ്റ്റംസിന് കണ്ടെത്താനായിട്ടുണ്ട്. അതിനാല്‍ അടുത്ത രണ്ടു ദിവസങ്ങളിലെ ഇവരുടെ നീക്കം നിര്‍ണ്ണായകമാണ്.