സ്വര്‍ണകടത്തല്ല , ഇത് നിലപാട് കടുപ്പിച്ച് എന്‍ഐ എ

 

  നയതന്ത്ര സ്വര്‍ണക്കടത്തിന് ഭീകരപ്രവര്‍ത്തനവുമായി ബന്ധമുള്ളതായി സംശയിക്കുന്നുവെന്ന് എന്‍ഐഎ കോടതിയില്‍ ആവര്‍ത്തിച്ചു വ്യക്തമാക്കിയതോടെ വെറുമൊരു സ്വര്‍ണക്കടത്ത് കേസ് എന്നതിനപ്പുറത്തേക്ക് തലനാരിഴ കീറിയുള്ള പരിശോധനയാണ് അന്വേഷണ ഏജന്‍സികള്‍ ലക്ഷ്യം വയ്ക്കുന്നത്. നയതന്ത്രബാഗേജില്‍ സ്വര്‍ണം കടത്താനുള്ള മുഖ്യ ആസൂത്രണം നടന്നത് യുഎഇയിലാണെന്നും ഇരുരാജ്യങ്ങളും തമ്മിലുള്ള ബന്ധത്തെ ബാധിക്കുന്ന കാര്യമായതിനാല്‍ അക്കാര്യവും വിശദമായി അന്വേഷിക്കുമെന്നും എന്‍ഐഎ വ്യക്തമാക്കി. രണ്ടാംപ്രതി സ്വപ്ന സുരേഷിനെയും നാലാംപ്രതി സന്ദീപ് നായരെയും കസ്റ്റഡിയില്‍ വാങ്ങാനായി കോടതിയില്‍ ഹാജരാക്കിയപ്പോഴാണ് ഇക്കാര്യങ്ങള്‍ അറിയിച്ചത്. ജ്വല്ലറികള്‍ക്കുവേണ്ടിയായിരുന്നില്ല സര്‍ണക്കടത്ത്. ഇവ തീവ്രവാദ സംഘങ്ങളിലേക്കാണ് പോകുന്നത്. 2019 മുതല്‍ ഈ സംഘം സ്വര്‍ണം കടത്തുന്നുണ്ട്. അടുത്തകാലത്ത് രണ്ടുതവണയായി ഒമ്പതു കിലോയും 18 കിലോയും സ്വര്‍ണം നയതന്ത്ര ബാഗേജില്‍ കടത്തിയിട്ടുണ്ട്. കോണ്‍സുലേറ്റിന്റെ സീലും എംബ്ലവും വ്യാജമായി ഉണ്ടാക്കിയുഎഇയില്‍നിന്ന് സ്വര്‍ണം അയക്കാന്‍ കോണ്‍സുലേറ്റിന്റെ സീലും എംബ്ലവും അവിടെ വ്യാജമായി ഉണ്ടാക്കി. അവ പതിപ്പിച്ച പാഴ്സലുകളാണ് പരിശോധനകള്‍ മറികടന്ന് അയക്കുന്നത്. ഇതിനെല്ലാം നേതൃത്വം നല്‍കിയത് മൂന്നാംപ്രതി ഫൈസല്‍ ഫരീദാണ്. യുഎഇ കോണ്‍സുലേറ്റിന്റെ പ്രവര്‍ത്തനരീതി അടുത്തറിയാന്‍മാത്രമാണ് സ്വപ്ന ഇവിടെ ജോലി ചെയ്തത്. മൂന്നുവര്‍ഷത്തോളം കോണ്‍സുലേറ്റ് ജനറല്‍ ഓഫീസിലെ എക്സിക്യൂട്ടീവ് സെക്രട്ടറിയായി പ്രവര്‍ത്തിച്ചു. മുഴുവന്‍ സ്വര്‍ണക്കടത്ത് കേസുകളും അതിനുപിന്നില്‍ പ്രവര്‍ത്തിച്ചവരെയും വെളിച്ചത്തുകൊണ്ടുവരാനാണ് ശ്രമിക്കുന്നത്. നേരത്തെ ആഭ്യന്തരമന്ത്രാലയം അന്വേഷിച്ചിരുന്നു. നയതന്ത്ര ബാഗേജില്‍ സ്വര്‍ണം കടത്തിയതുസംബന്ധിച്ച് യുഎഇയും അന്വേഷിക്കുന്നുണ്ടെന്നുണ്ടെന്നും എന്‍ഐഎ പറഞ്ഞു. സ്വര്‍ണക്കടത്തിനെ തീവ്രവാദസംഘങ്ങളുമായി ബന്ധിപ്പിക്കുന്നത് എങ്ങനെയാണെന്ന് പ്രത്യേക കോടതി ജഡ്ജി പി കൃഷ്ണകുമാര്‍ എന്‍ഐഎ അഭിഭാഷകനോട് ആരാഞ്ഞിരുന്നു. പ്രതികളില്‍നിന്നു പിടിച്ചെടുത്തു കോടതിയില്‍ സമര്‍പ്പിച്ചിരിക്കുന്ന ഡിജിറ്റല്‍ തെളിവുകള്‍ നിര്‍ണായകമാകും. അടുത്തഘട്ടത്തില്‍ വിദേശത്തുനിന്നു കടത്തിയ കിലോക്കണക്കിനു സ്വര്‍ണം എത്തിച്ചേര്‍ന്നവരെ കണ്ടെത്താനുള്ള നീക്കത്തിലാണ് എന്‍ഐഎ. ഇവര്‍ക്കു ഭീകരസംഘനകളുമായുള്ള ബന്ധത്തെക്കുറിച്ചും വ്യാപകമായി അന്വേഷിക്കും. പ്രതിയായ സന്ദീപ് നായരുമായി തിരുവനന്തപുരത്തു നടത്തിയ തെളിവെടുപ്പിനിടെ കണ്ടെത്തിയ ഡിജിറ്റല്‍ വിഡിയോ റെക്കോഡര്‍ (ഡിവിആര്‍) നിര്‍ണായക തെളിവാകുമെന്നാണ് എന്‍ഐഎ കരുതുന്നത്. പ്രതികള്‍ കൂടിക്കാഴ്ച നടത്തിയ ആളുകളെക്കുറിച്ചും നടത്തിയ നീക്കങ്ങളെക്കുറിച്ചും ഡിവിആറിലെ ദൃശ്യങ്ങളില്‍നിന്നും വിവരം ലഭിക്കുമെന്നാണു പ്രതീക്ഷിക്കുന്നത്.