രാമക്ഷേത്രത്തിന് ഉയരം 161 അടി

അയോധ്യയിലെ നിർദിഷ്ട രാമക്ഷേത്രത്തിന് ഉയരം 161 അടി. അഞ്ചു താഴികക്കുടങ്ങളുമുണ്ടാകും ക്ഷേത്രത്തിന്. മഹന്ത് നൃത്യഗോപാൽ ദാസിന്‍റെ അധ്യക്ഷതയിൽ ഇന്നലെ ചേർന്ന രാമജന്മഭൂമി തീർഥ ക്ഷേത്ര ട്രസ്റ്റ് യോഗത്തിനുശേഷം ട്രസ്റ്റ് അംഗം കാമേശ്വർ ചൗപ്പലാണ് ഇക്കാര്യം അറിയിച്ചത്. നേരത്തേ, മൂന്നു താഴികക്കുടങ്ങളെന്നാണ് തീരുമാനിച്ചിരുന്നത്. ഇന്നലത്തെ യോഗത്തിൽ ഇത് അഞ്ചാക്കാൻ തീരുമാനിക്കുകയായിരുന്നു. ഓഗസ്റ്റ് മൂന്നിനും അഞ്ചിനും ശുഭ മുഹൂർത്തങ്ങളുണ്ടെന്നും ഇതിലൊന്ന് ഭൂമി പൂജയ്ക്കായി തെരഞ്ഞെടുക്കാൻ പ്രധാനമന്ത്രി നരേന്ദ്ര മോദിയോട് അഭ്യർഥിച്ചിട്ടുണ്ടെന്നും കഴിഞ്ഞദിവസം ട്രസ്റ്റ് അധികൃതർ അറിയിച്ചിരുന്നു. വിഎച്ച്പി അധ്യക്ഷനായിരുന്ന അശോക് സിംഗാൾ ചുമതലപ്പെടുത്തിയ വാസ്തുശിൽപ്പി ചന്ദ്രകാന്ത് സോംപുരയാണ് ക്ഷേത്രത്തിന്‍റെ മാതൃക തയാറാക്കിയത്. ഈ മാതൃകയിൽ ഉയരവും നീളവും വീതിയും വർധിപ്പിച്ചാകും ക്ഷേത്രം നിർമിക്കുക. മൂന്നു വർഷത്തിനുള്ളിൽ ക്ഷേത്ര നിർമാണം പൂർത്തിയാക്കാനാണു ലക്ഷ്യമിടുന്നതെന്നും ട്രസ്റ്റ്. കഴിഞ്ഞ നവംബറിലാണ് അയോധ്യയിലെ തർക്കഭൂമി ക്ഷേത്ര നിർമാണത്തിന് സർക്കാർ നിയന്ത്രണത്തിലുള്ള ട്രസ്റ്റിന് കൈമാറാൻ സുപ്രീം കോടതി വിധിച്ചത്. മുസ്‌ലിം വിഭാഗത്തിനു പള്ളി നിർമിക്കാൻ ജില്ലാ പരിധിയിൽ അഞ്ചേക്കർ ഭൂമി അനുവദിക്കാനും കോടതി ഉത്തരവിട്ടിരുന്നു. 1989ലാണ് അഹമ്മദാബാദ് ആസ്ഥാനമായി പ്രവർത്തിക്കുന്ന വാസ്തുശിൽപ്പി സോംപുര രാമക്ഷേത്രത്തിനു മാതൃക തയാറാക്കിയത്. അന്ന് 130 അടി ഉയരവും മൂന്നു താഴികക്കുടങ്ങളുമെന്നാണു തീരുമാനിച്ചിരുന്നത്. കൂടുതൽ ഭക്തരുടെ പങ്കാളിത്തം ഉറപ്പിക്കാനാണ് ഉയരവും താഴികക്കുടങ്ങളുടെ എണ്ണവും വർധിപ്പിച്ചതെന്നു സോംപുര. ഇദ്ദേഹത്തിന്‍റെ അച്ഛൻ പ്രഭാകറാണ് ഗുജറാത്തിലെ സോമനാഥ ക്ഷേത്രം നിർമിച്ചത്. ഗാന്ധിനഗറിലെ സ്വാമി നാരായൺ ക്ഷേത്രവും പലൻപുരിലെ അംബാജി ക്ഷേത്രവുമുൾപ്പെടെ 31 ക്ഷേത്രങ്ങൾ നിർമിച്ചിട്ടുണ്ട് സോംപുരയുടെ കുടുംബത്തിൽ നിന്നുള്ള വാസ്തുശിൽപ്പിമാർ. ക്ഷേത്ര നിർമാണത്തിനു ചുവപ്പു നിറമുള്ള മാർബിളായിരിക്കും ഉപയോഗിക്കുക. 212 തൂണുകളുണ്ട് ക്ഷേത്രത്തിന്. 106 എണ്ണം പൂർത്തിയായി. ലാർസൻ ആൻഡ് ടുബ്രോ കമ്പനിയാണ് സാങ്കേതിക സഹായം നൽകുന്നത്.