അന്വേഷണം അയല്‍ സംസ്ഥാനങ്ങളിലേക്കും

  നയതന്ത്ര ബാഗേജ് വഴിയുള്ള സ്വര്‍ണക്കടത്തു കേസ് അയല്‍ സംസ്ഥാനങ്ങളിലേക്കും വ്യാപിപ്പിക്കുന്നു. തമിഴ്‌നാട്, കര്‍ണാടക, പുതുച്ചേരി, ആന്ധ്ര, തെലങ്കാന എന്നിവിടങ്ങളിലേക്കാണ് അന്വേഷണം നീളുന്നത്. ഈ സംസ്ഥാനങ്ങളിലുള്ളവരുടെയും വീസ സ്റ്റാംപിങ് തിരുവനന്തപുരത്തെ കോണ്‍സുലേറ്റിലാണ്. ഈ സംസ്ഥാനങ്ങള്‍ വഴി സ്വര്‍ണം കടത്തിയോ എന്നാണ് പരിശോധിക്കുന്നത്. വടക്കന്‍ കേരളത്തില്‍ കൂടുതല്‍ ബന്ധങ്ങള്‍ കണ്ടത്തിയതാണ് മംഗലാപുരം ലിങ്ക് പരിശോധിക്കുന്നത്. ഇതിനിടെ നയതന്ത്ര പാഴ്‌സല്‍ ദുബായ് വിമാനത്താവളത്തിലെത്തിക്കാന്‍ ഫൈസല്‍ ഫരീദ് തേപ്പറമ്പിലിനെ ചുമതലപ്പെടുത്തി യുഎഇ കോണ്‍സുലേറ്റിലെ ഷാര്‍ഷ് ദ് അഫയേഴ്‌സ് റാഷിദ് ഖമീസ് അലി നല്‍കിയതായി പറയുന്ന ഓതറൈസേഷന്‍ ലൈറ്ററും പുറത്തുവന്നു. ഇത് യഥാര്‍ഥമാണോ എന്നതു സ്ഥിരീകരിക്കപ്പെട്ടിട്ടില്ല. കഴിഞ്ഞ വര്‍ഷം കോണ്‍സല്‍ ജനറലിന്റെ പേരില്‍ പാഴ്‌സല്‍ എയര്‍ കാര്‍ഗോയിലെത്തിച്ചെന്നു പറയുന്ന പെരിന്തല്‍മണ്ണ സ്വദേശി അബ്ദുല്‍ ഹമീദ് വഴി പുറത്തായ കത്തുമായി സാമ്യമുള്ളതാണ്. ദുബായില്‍ നിന്ന് വിവരങ്ങള്‍ ലഭിച്ചാല്‍ മാത്രമേ ഇതിന്റെ കൂടുതല്‍ സ്ഥിരീകരണം ലഭിക്കുകയുള്ളൂ.