ആശുപത്രിയായി മാറി കാലിക്കറ്റ് സര്‍വകലാശാല

 

ലക്ഷണങ്ങളും മറ്റ് ആരോഗ്യ പ്രശ്‌നങ്ങളുമില്ലാത്ത കോവിഡ് രോഗികള്‍ക്കായി 1500 കിടക്കകളുള്ള പ്രാഥമിക ചികിത്സാകേന്ദ്രം കലിക്കറ്റ് സര്‍വകലാശാലാ ക്യാമ്പസിലെ വനിതാ ഹോസ്റ്റലില്‍ ഒരുങ്ങി. സംസ്ഥാനത്തെ വലിയ ഫസ്റ്റ്ലൈന്‍ ട്രീറ്റ്‌മെന്റ് സെന്ററാണിത്. വനിതാ ഹോസ്റ്റലിലെ എവറസ്റ്റ്, പാരിജാതം ഹോസ്റ്റലുകളിലാണ് 750 കിടക്കകള്‍വീതം സജീകരിച്ചത്. 15 ഡോക്ടര്‍മാര്‍, 50 സ്റ്റാഫ് നേഴ്‌സ്, 50 ക്ലീനിങ് സ്റ്റാഫ്, രണ്ട് ഫാര്‍മസിസ്റ്റ്, നാല് ജൂനിയര്‍ ഹെല്‍ത്ത് ഇന്‍സ്‌പെക്ടര്‍, രണ്ട് ഡാറ്റാ എന്‍ടി ഓപറേറ്റര്‍മാര്‍ എന്നിവരടക്കം 123 ജീവനക്കാരെ സെന്ററില്‍ നിയോഗിച്ചു. ഇവര്‍ക്കുള്ള താമസസൗകര്യവും കോമ്പൗണ്ടിനകത്തുതന്നെയാണ്. രോഗികളുടെ മാനസിക സമ്മര്‍ദം കുറയ്ക്കാനുള്ള സംവിധാനങ്ങളും ഇ?ന്റര്‍നെറ്റും കേന്ദ്രത്തില്‍ ഒരുക്കും. ആയിരത്തിലധികം കിടക്കകളും തലയണയും കയര്‍ബോര്‍ഡില്‍നിന്നാണ് എത്തിച്ചത്. രോഗം മൂര്‍ഛിച്ചാല്‍ ആശുപത്രിയില്‍ എത്തിക്കാന്‍ രണ്ട് ആംബുലന്‍സുകളും സജ്ജമാക്കി. മെഡിക്കല്‍ മാലിന്യം സംസ്‌കരിക്കാന്‍ സംവിധാനങ്ങളും ഒരുക്കി. തിരൂരങ്ങാടി താലൂക്ക് ആശുപത്രിയാണ് നോഡല്‍ ആശുപത്രി. ചെട്ട്യാര്‍മാട്ടിലൂടെയാകും ചികിത്സാകേന്ദ്രത്തിലേക്കുള്ള വഴി. സര്‍വകലാശാലാ ക്യാമ്പസിനകത്തുനിന്നുള്ള വഴി അടച്ചിടും. സെന്ററില്‍ എത്താന്‍ സൂചനാബോര്‍ഡുകള്‍ സ്ഥാപിച്ചു. ഒരാഴ്ചകൊണ്ടാണ് കലിക്കറ്റില്‍ ചികിത്സാകേന്ദ്രം സജ്ജമാക്കിയത്. കലക്ടര്‍ കെ ഗോപാലകൃഷ്ണന്‍, ജില്ലാ മെഡിക്കല്‍ ഓഫീസര്‍  കെ സക്കീന, സബ് കലക്ടര്‍ കെ എസ് അഞ്ജു, കലിക്കറ്റ് സര്‍വകലാശാലാ രജിസ്ട്രാര്‍ ഡോ. സി എല്‍ ജോഷി എന്നിവര്‍ സെന്റര്‍ സന്ദര്‍ശിച്ചു. ചികിത്സക്ക് 8000 കിടക്ക രോഗികളുടെ എണ്ണം കൂടുന്ന സാഹചര്യത്തില്‍ ചികിത്സാ സൗകര്യങ്ങള്‍ വര്‍ധിപ്പിച്ച് ജില്ലാ ഭരണകേന്ദ്രവും ആരോഗ്യ വകുപ്പും. കോവിഡ് ചികിത്സയ്ക്കായി 8000 കിടക്കകള്‍ സജ്ജമാക്കുമെന്ന കലക്ടര്‍ കെ ഗോപാലകൃഷ്ണന്‍ പറഞ്ഞു. സര്‍ക്കാര്‍ നിര്‍ദേശത്തെത്തുടര്‍ന്നാണിത്. പ്രവൃത്തി അടുത്ത ദിവസംതന്നെ തുടങ്ങും. 20 കോവിഡ് പ്രാഥമിക ചികിത്സാ കേന്ദ്രങ്ങള്‍ (ഫസ്റ്റ്ലൈന്‍ ട്രീറ്റ്മെന്റ് സെന്റര്‍) ഒരുക്കും. ഇതിനകം അഞ്ച് സെന്ററുകള്‍ സജ്ജമാക്കി. കലിക്കറ്റ് ഹോസ്റ്റലിനുപുറമെ 1095 കിടക്കകളാണ് തയ്യാറാക്കിയതെന്ന് അദ്ദേഹം പറഞ്ഞു.