നോട്ടില്ല ഇവര്‍ക്ക് എല്ലാം സ്വര്‍ണ്ണം

  കേരളത്തില്‍ കറന്‍സികള്‍ ഉപയോഗിക്കാതെ സ്വര്‍ണ്ണം ഉപയോഗിച്ചുള്ള വന്‍കിട കച്ചവടങ്ങള്‍ സജീവമെന്ന് റിപ്പോര്‍ട്ട്. നോട്ട് നിരോധനത്തിന് ശേഷമാണ് ഈ രീതിയില്‍ വമ്പന്‍മാര്‍ വ്യാപാരങ്ങള്‍ തുടങ്ങിയത്. കുഴല്‍പ്പണ റാക്കറ്റുകള്‍ കള്ളപ്പണമായി കറന്‍സി നോട്ടുകളുടെ തുല്യതുകയ്ക്കുള്ള സ്വര്‍ണം കൈമാറുന്ന രീതിയെ പറ്റി ഇഡിക്ക് രഹസ്യവിവരം ലഭിച്ചിട്ടുണ്ട്. റിയല്‍ എസ്റ്റേറ്റ്, സിനിമ നിര്‍മാണ രംഗത്തും പണത്തിനു പകരം സ്വര്‍ണം കൈമാറിയ സംഭവങ്ങളുടെ വിശദാംശങ്ങള്‍ രഹസ്യാന്വേഷണ റിപ്പോര്‍ട്ടിലുണ്ട്. പാരിസ് ഭീകരാക്രമണക്കേസ് അന്വേഷിക്കാന്‍ ദേശീയ അന്വേഷണ ഏജന്‍സിയുടെ(എന്‍ഐഎ) സഹായം തേടി കഴിഞ്ഞ വര്‍ഷം കൊച്ചിയിലെത്തിയ ഫ്രഞ്ച് പൊലീസ്, സ്വര്‍ണത്തെ മെറ്റല്‍ കറന്‍സിയായി ഭീകരര്‍ ഉപയോഗിക്കുന്ന വിവരങ്ങള്‍ കൈമാറിയിരുന്നു. സ്വര്‍ണക്കടത്ത് കേസിലെ പ്രതികള്‍ രാജ്യത്തിന്റെ സാമ്പത്തികഭദ്രത തകര്‍ക്കാന്‍ ശ്രമിച്ചതിന് മതിയായ തെളിവ് ലഭിച്ചതായി ദേശീയ അന്വേഷണ ഏജന്‍സി വെളിപ്പെടുത്തിയത് ഇതിന്റെ അടിസ്ഥാനത്തിലാണ് . സ്വര്‍ണം കടത്തിയ കേസിലെ രണ്ടാംപ്രതി സ്വപ്ന സുരേഷ്, നാലാം പ്രതി സന്ദീപ് നായര്‍ എന്നിവരെ ഹാജരാക്കി പ്രത്യേക കോടതിയില്‍ സമര്‍പ്പിച്ച റിമാന്‍ഡ് റിപ്പോര്‍ട്ടിലാണ് എന്‍ഐഎ ഇക്കാര്യം വ്യക്തമാക്കിയത്. പ്രതികള്‍ പ്രഥമദൃഷ്ട്യാ കുറ്റക്കാരാണ്. പ്രതികളുടെയാകെ പങ്ക് വ്യക്തമാക്കുന്ന നിര്‍ണായക തെളിവുകളും കിട്ടിക്കഴിഞ്ഞു. അത് കോടതിക്ക് രേഖാമൂലം കൈമാറാന്‍ തയ്യാറാണ്. കള്ളക്കടത്തിനുപിന്നില്‍ വമ്പന്‍ ഗൂഢാലോചന നടന്നിട്ടുണ്ട്. ഇത് പുറത്തുകൊണ്ടുവരേണ്ടതുണ്ടെന്നും എന്‍ഐഎ കോടതിയെ അറിയിച്ചു. കള്ളക്കടത്തുസ്വര്‍ണവും മറ്റും കണ്ടെടുക്കാന്‍ കൂടുതല്‍ അന്വേഷണവും തെളിവെടുപ്പും ആവശ്യമാണെന്ന് കസ്റ്റഡി അപേക്ഷയിലും പറഞ്ഞു. തെളിവുകള്‍ രേഖാമൂലം തിങ്കളാഴ്ച സമര്‍പ്പിക്കും.