പാര്‍ട്ടിപിടിക്കാന്‍ ഗ്രേഡിങ്ങുമായി മുല്ലപ്പള്ളി

പാര്‍ട്ടിയില്‍ അധികാരം ഉറപ്പിക്കാന്‍ രാഹുല്‍ മോഡല്‍ ഗ്രേഡിങ്ങുമായി മുല്ലപ്പള്ളി. കഴിഞ്ഞ ഒരു മാസത്തിനിടയില്‍ കെ പി സി സിയില്‍ നിന്ന് തനിക്ക് പിന്‍തുണ കുറഞ്ഞതിനെ തുടര്‍ന്നാണ് ഗ്രേഡിങ്ങ് രീതിയിലൂടെ പാര്‍ട്ടി പിടിക്കാന്‍ മുല്ലപ്പള്ളി ഒരുങ്ങുന്നത്. എ ഐ സിസി നേതൃത്വത്തില്‍ എത്തിയ സമയത്ത് മുതിര്‍ന്ന നേതാക്കളെ വെട്ടി പാര്‍ട്ടി സ്വന്തം പാളയത്തില്‍ രാഹുല്‍ ഗാന്ധി എത്തിച്ചത് ഇതേ ഗ്രേഡിങ്ങ് രീതിഉപയോഗിച്ചായിരുന്നു. മുബൈ, ഡല്‍ഹി കേന്ദ്രീകരിച്ച് പ്രവര്‍ത്തിച്ചിരുന്ന ഒരു വന്‍ പി ആര്‍ ഏജന്‍സിയായിരുന്നു അന്നത് നടപ്പാക്കിയത്. ഇന്ന് കേരളത്തിലെ കോണ്‍ഗ്രസില്‍ സജീവമായ രാഹുല്‍ ബ്രിഗേഡ് ഉണ്ടാക്കിയെടുത്തത് ഈ രീതിയിലായിരുന്നു. അതുതന്നെയാണ് മുല്ലപ്പള്ളി നടപ്പാക്കുന്നത്. തദ്ദേശ സ്വയംഭരണ തിരഞ്ഞെടുപ്പിന് മുന്‍പ് പാര്‍ട്ടിയെ തന്റെ നിയന്ത്രണത്തില്‍ ആക്കാനാണ് മുല്ലപ്പള്ളിയുടെ നീക്കം. ഉമ്മന്‍ചാണ്ടിയും കുഞ്ഞാലിക്കുട്ടിയും ഒന്നിച്ച് യു ഡി എഫില്‍ നടത്തുന്ന കളികള്‍ക്ക് മൂക്കുകയര്‍ ഇടാനും പാര്‍ട്ടിയില്‍ അധീശത്തം നേടണമെന്ന തിരിച്ചറിവില്‍ നിന്നാണ് പദ്ധതിയുമായി മുന്നോട്ടു നീ്ങ്ങുന്നത്. ഇതുസരിച്ച് കര്‍ശനമായ പരിശോധന നടത്തി ഒരു പണിയും ചെയ്യാത്ത നേതാക്കളെ മൂന്നുമാസത്തിനുള്ളില്‍ മാറ്റാനാണ് രഹസ്യ തീരുമാനം. ഇതിന് രാഹുല്‍ ഗാന്ധിയുടെ അനുമതി നേടിയെടുത്തിട്ടുണ്ട്. പുന സംഘടനയില്‍ ഗ്രൂപ്പ് മാനദണ്ഡം വച്ച് കടന്നുകയറിയവര്‍ക്ക് ഇത് വലിയ തിരിച്ചടി ആകും. ഈ പരീക്ഷയിലും മാര്‍ക്ക് ദാനത്തിലും കെ പി സി സി പ്രസിഡന്റിനും , പദ്ധതി മേല്‍നോട്ടം വഹിക്കുന്ന ഏജന്‍സിക്കും മാത്രമാണ് റോള്‍. കൂടുതലും പറത്താകുക ഉമ്മന്‍ചാണ്ടിയുടെ വിശ്വസ്ഥരാണന്ന കണക്കുകൂട്ടലില്‍ ചെന്നിത്തലയും ഇതിന് മൗന സമ്മതം നല്‍കിയിട്ടുണ്ട്.