സര്‍ക്കാരുകള്‍ക്ക് നെയ്‌വേലി നല്‍കുന്ന പാഠം

തമിഴ്‌നാട്ടില്‍ കേന്ദ്ര സര്‍ക്കാര്‍ സ്ഥാപനമായ നെയ്വേലി ലിഗ്‌നൈറ്റ്് കോര്‍പറേഷനില്‍ ബോയിലര്‍ സ്‌ഫോടനത്തില്‍ ആറു തൊഴിലാളികള്‍ മരിക്കുകയും 17 പേര്‍ക്കു പൊള്ളലേല്‍ക്കുകയും ചെയ്ത സംഭവം വ്യവസായ സുരക്ഷാ മാനദണ്ഡങ്ങള്‍ കൃത്യമായി പാലിക്കാതിരിക്കുന്നത് എത്ര വലിയ ദുരന്തത്തിനാണു വഴിതെളിക്കുക എന്നു വീണ്ടും തെളിയിക്കുകയാണ്. നവരത്‌ന പദവിയുള്ള പൊതുമേഖലാ സ്ഥാപനമാണ് നെയ്വേലി ലിഗ്‌നൈറ്റ്് കോര്‍പറേഷന്‍. അതിന്റെ താപവൈദ്യുതി നിലയത്തിലെ അഞ്ചാം യൂണിറ്റിലായിരുന്നു അപകടം. താപവൈദ്യുതി നിലയം പോലൊരു സ്ഥാപനം പോലും പൂര്‍ണ സുരക്ഷിതമല്ലെങ്കില്‍ രാജ്യത്തെ മറ്റു വ്യവസായ സ്ഥാപനങ്ങളുടെ സ്ഥിതിയെന്താണ് കൃത്യമായ സുരക്ഷാ മാനദണ്ഡങ്ങള്‍ പാലിച്ചില്ലെങ്കില്‍ താപവൈദ്യുതി നിലയത്തിലെ ബോയിലര്‍ വളരെ അപകടകാരിയായി മാറുന്ന ഉപകരണമാണ്. കൂടിയ മര്‍ദവും ഉയര്‍ന്ന താപനിലയിലുള്ള നീരാവിയും ഉള്ളതിനാല്‍ അതിന് ഒരു മാരകായുധത്തെപ്പോലെ പ്രവര്‍ത്തിക്കാന്‍ കഴിയും. അതുകൊണ്ടുതന്നെ ഇത്തരം വ്യവസായ സ്ഥാപനങ്ങളുടെ സുരക്ഷയ്ക്കു വളരെ കര്‍ക്കശമായ വ്യവസ്ഥകള്‍ ഇന്ത്യന്‍ ബോയിലേഴ്‌സ് ആക്ടില്‍ ഉള്‍ക്കൊള്ളിച്ചിട്ടുണ്ട്. എന്നാല്‍, അതെല്ലാം കടലാസില്‍ മാത്രമേയുള്ളു എന്നാണ് ഇത് തെളിയിക്കുന്നത് . ഇതുറപ്പു വരുത്താന്‍ സ്ഥാപന അധികാരികള്‍ക്കു മാത്രമല്ല, കേന്ദ്ര- സംസ്ഥാന സര്‍ക്കാരുകള്‍ക്കും ഉത്തരവാദിത്വമുണ്ട്. വ്യവസായ ദുരന്തങ്ങളുണ്ടാകുന്‌പോള്‍ ഇരകളുടെ കുടുംബങ്ങള്‍ക്കു ചില ആശ്വാസ പാക്കേജുകള്‍ പ്രഖ്യാപിച്ചു കൈകഴുകുകയാണു കേന്ദ്ര- സംസ്ഥാന സര്‍ക്കാരുകളുടെ പതിവ്. അതു മാത്രം പോരാ, ദുരന്തങ്ങള്‍ ആവര്‍ത്തിക്കില്ലെന്ന് ഉറപ്പാക്കാനുള്ള നടപടികളും സര്‍ക്കാരുകളുടെ ഭാഗത്തുനിന്നുണ്ടാകണം. ചെന്നൈയില്‍നിന്ന് 200 കിലോമീറ്റര്‍ അകലെ നെയ്വേലിയിലുള്ള എന്‍എല്‍സി വളരെ ലാഭത്തില്‍ പ്രവര്‍ത്തിക്കുന്ന ഒരു കേന്ദ്ര പൊതുമേഖലാ സ്ഥാപനമാണ്. ഒരു താപനിലയത്തിന്റെ സുരക്ഷിതമായ കാലപരിധി 25 വര്‍ഷമാണെന്നു വിദഗ്ധര്‍ വിലയിരുത്തുന്നു. എന്നാല്‍ എന്‍എല്‍സിയിലെ യൂണിറ്റുകള്‍ പലതും 25വര്‍ഷം മുതല്‍ 57 വര്‍ഷംവരെ പഴക്കമുള്ളവയാണ്. പുതിയ യൂണിറ്റുകള്‍ കമ്മീഷന്‍ ചെയ്യാന്‍ വൈകുന്നത് അടക്കമുള്ള അനവധാനതകള്‍ വലിയ ദുരന്തങ്ങളിലേക്കു നയിക്കുന്‌പോഴാണ് അധികാരികളുടെ കണ്ണുതുറക്കുക. എന്‍എല്‍സിയിലുണ്ടായതുപോലുള്ള അപകടങ്ങള്‍ തീര്‍ത്തും ഒറ്റപ്പെട്ടതല്ല എന്നതാണ് ആശങ്കയുണ്ടാക്കുന്ന കാര്യം. ആന്ധ്രപ്രദേശിലെ വിശാഖപട്ടണത്ത് ചൊവ്വാഴ്ച ഒരു ഫാര്‍മസ്യൂട്ടിക്കല്‍ കന്പനിയിലുണ്ടായ വാതകച്ചോര്‍ച്ചയില്‍ രണ്ടുപേര്‍ മരിച്ചു. രണ്ടുമാസം മുമ്പു വിശാഖപട്ടണത്തുതന്നെ കെമിക്കല്‍ പ്ലാന്റിലുണ്ടായ വാതകച്ചോര്‍ച്ചയില്‍ 12 പേര്‍ മരിക്കുകയും ആയിരത്തോളം പേരെ ആശുപത്രിയില്‍ പ്രവേശിപ്പിക്കുകയും ചെയ്തിരുന്നു. സ്‌റ്റൈറീന്‍ വാതകമാണ് അന്നു ചോര്‍ന്നത്. ലോകം കണ്ട ഏറ്റവും വലിയ വ്യാവസായിക ദുരന്തത്തിന്റെ ഓര്‍മകള്‍ മധ്യപ്രദേശിന്റെ തലസ്ഥാനമായ ഭോപ്പാല്‍ നഗരത്തെ ഇന്നും വേട്ടയാടുന്നുണ്ട്. 1984 ഡിസംബര്‍ രണ്ടിന് അര്‍ധരാത്രിയോടെ ഭോപ്പാലിലെ യൂണിയന്‍ കാര്‍ബൈഡ് ഫാക്ടറിയിലുണ്ടായ വാതകച്ചോര്‍ച്ചയെത്തുടര്‍ന്ന് ആദ്യ രണ്ടു ദിവസം കൊണ്ടുതന്നെ 5,295 പേര്‍ മരിച്ചു. തുടര്‍ന്നുണ്ടായ രോഗങ്ങളില്‍ 10,047 പേരും മരിച്ചതായാണ് ഔദ്യോഗിക കണക്ക്. 36 വര്‍ഷം മുന്പു നടന്ന ദുരന്തത്തിന്റെ ജീവിച്ചിരിക്കുന്ന രക്തസാക്ഷികളായി നിരവധി പേര്‍ മാരകരോഗങ്ങള്‍ക്ക് അടിമപ്പെട്ടു ജീവിതം തള്ളിനീക്കുന്നു. ഭോപ്പാല്‍ ദുരന്തത്തെത്തുര്‍ന്നു കേസും കോടതിനടപടികളും ഉണ്ടായെങ്കിലും യൂണിയന്‍ കാര്‍ബൈഡ് അധികൃതര്‍ വേണ്ടവിധം ശിക്ഷിക്കപ്പെട്ടില്ല. നിഷ്പക്ഷമായ നിയമവാഴ്ചക്ക് സാഹചര്യം ഉണ്ടായാലേ വ്യവസായസുരക്ഷ പോലും സാധ്യമാകൂ.