അച്ചടക്കം എല്ലാവര്‍ക്കും ബാധകം ബെന്നിബഹനാന്‍

  യു ഡി എഫിലെ അച്ചടക്കം പാലിക്കാന്‍ വലിപ്പചെറുപ്പമില്ലാതെ എല്ലാവരും ബാധ്യസ്ഥരാണന്ന് കണ്‍വീനര്‍ ബെന്നിബഹനാന്‍. ജോസ് കെ മാണിക്കെതിരായ നടപടിയെ തുടര്‍ന്ന് കാര്‍മേഘങ്ങള്‍ ഉരുണ്ടുകൂടുന്നതിനിടെയാണ് വീണ്ടും നിലപാട് കണ്‍വീനര്‍ വ്യക്തമാക്കുന്നത്. യു.ഡി.എഫില്‍ തുടരാന്‍ ജോസ് കെ മാണി വിഭാഗത്തിന് അര്‍ഹതയില്ലെന്നാണ് യു.ഡി.എഫ് കണ്‍വീനര്‍ ബെന്നി ബെഹ്നാന്‍ പറഞ്ഞത്. കോട്ടയം ജില്ലാപ്രസിഡന്റ് സ്ഥാനം സംബന്ധിച്ച യുഡിഎഫ് നേതൃത്വത്തിന്റെ തീരുമാനത്തെ ജോസ് കെ മാണി വിഭാഗം അംഗീകരിക്കാന്‍ തയ്യാറായില്ല. യു.ഡി.എഫ് തീരുമാനം അംഗീകരിക്കാത്തവര്‍ മുന്നണിയില്‍ വേണ്ട. യു.ഡി.എഫ് യോഗത്തില്‍ നിന്നും ജോസ് വിഭാഗത്തെ മാറ്റിനിര്‍ത്തിയെന്നും ബെന്നി ബെഹനാന്‍ അറിയിച്ചു. യുഡിഎഫ് ആവശ്യപ്പെട്ടാല്‍ മധ്യസ്ഥതയ്ക്ക് തയ്യാറാണെന്നും ജോസ് കെ മാണിക്കു മുന്നില്‍ വാതില്‍ കൊട്ടിയടച്ചിട്ടില്ലെന്നും ലീഗ് നേതാവ് പി കെ കുഞ്ഞാലിക്കുട്ടി പ്രതികരിച്ചു. കോട്ടയത്തെ ധാരണ നടപ്പാക്കിയാല്‍ ഇനിയും ചര്‍ച്ചയ്ക്ക് സാധ്യതയുണ്ടെന്ന് ഉമ്മന്‍ചാണ്ടി പ്രതികരിച്ചു. പ്രശ്നം എങ്ങനെയും പരിഹരിക്കണമെന്ന് ഘടകകക്ഷികള്‍ ആവശ്യപ്പെടുമ്പോള്‍ കോണ്‍ഗ്രസ് നേതൃത്വം കൈയ്യുംകെട്ടിനില്‍ക്കുകയാണെന്ന് ആക്ഷേപമുണ്ട്.