കെ കെ ശൈലജടീച്ചര്‍ മികച്ച മന്ത്രി മുല്ലപ്പള്ളി

 

ആരോഗ്യമന്ത്രി കെ കെ ശൈലജ ടീച്ചറെ പുകഴ്ത്തി കെപിസിസി പ്രസിഡന്റ് മുല്ലപ്പള്ളി രാമചന്ദ്രന്‍. സ്വന്തം പരിമിതികള്‍ക്കുള്ളില്‍ നിന്നാണെങ്കിലും സദാസമയവും കഠിനാദ്ധ്വാനിയായ മന്ത്രിയാണ് അവരെന്നും മുല്ലപ്പള്ളി അഭിപ്രായപ്പെട്ടു. കൗമുദി ടിവിയിലെ സ്‌ട്രെയിറ്റ് ലൈന്‍ അഭിമുഖ പരിപാടിയില്‍ വി എസ് രാജേഷിനോട് അദേഹം ഇക്കാര്യം പറയുന്നത്.' ശൈലജയുമായും കുടുംബവുമായും ദീര്‍ഘവര്‍ഷത്തെ സൗഹൃദമുണ്ട്. സഹോദരിയായിട്ടേ എന്നും കണ്ടിട്ടുള്ളൂ. തിരിച്ചും സ്‌നേഹ ബഹുമാനത്തോടെ മാത്രമേ അവര്‍ പെരുമാറിയിട്ടുമുള്ളൂ. അവരെ അധിക്ഷേപിച്ച് സംസാരിച്ചിട്ടില്ല. എന്നാല്‍ രാഷ്ട്രീയമായി പറഞ്ഞ കാര്യങ്ങളില്‍ ഉറച്ചു നില്‍ക്കുന്നു. എന്നാല്‍ തികച്ചും ആകസ്മികമായി, നര്‍മ്മത്തോടെ സരസമായി പറഞ്ഞ കാര്യങ്ങള്‍ വളച്ചൊടിച്ച് വിവാദമാക്കാനാണ് ശ്രമിച്ചത്.'-മുല്ലപ്പള്ളി പറഞ്ഞു. നിപയുമായി ബന്ധപ്പെട്ട് പ്രതിപക്ഷ നേതാവും ലീഗ് നേതാവ് എം.കെ.മുനീറും പറഞ്ഞ കാര്യങ്ങള്‍ക്ക് അനുബന്ധമായി സംസാരിച്ചപ്പോഴാണ് ഈ പരാമര്‍ശമുണ്ടായത്. ദുരന്തത്തെപ്പോലും രാഷ്ട്രീയമായി ഉപയോഗിക്കാന്‍ സിപിഎം ശ്രമിക്കുന്നുവെന്നാണ് മുനീര്‍ പറഞ്ഞത്. നിപയെ പ്രതിരോധിച്ചത് ആരോഗ്യ പ്രവര്‍ത്തകരുടെ മിടുക്കായിരുന്നു. കോവിഡ് ഉണ്ടാകുന്നതിനു മുമ്പും ജനങ്ങളെ ആകര്‍ഷിക്കും വിധം നല്ല രീതിയില്‍ പെരുമാറുന്ന മന്ത്രിയാണ് ശൈലജ. ഒന്നുമല്ലെങ്കിലും ഹൃദ്യമായി ചിരിക്കാന്‍ അറിയാം. ചിരിക്കാത്ത ധാര്‍ഷ്ട്യമുള്ള നേതാക്കളാണ് സിപിഎമ്മില്‍ കൂടുതല്‍. റോക്ക് സ്റ്റാറിന്റെ അര്‍ത്ഥം അറിയാത്ത ആളൊന്നുമല്ല താന്‍. വിവാദം വളര്‍ത്തിയതിനു പിന്നില്‍ സ്വന്തം പാര്‍ട്ടിക്കാരുണ്ടോയെന്നും, ഒറ്റപ്പെടുത്താന്‍ നീക്കമുണ്ടോയെന്നുമുള്ള ചോദ്യത്തിന് മറുപടി ഇങ്ങനെയായിരുന്നു.' എന്നെ ഒറ്റപ്പെടുത്താന്‍ ഇതിനു മുമ്പും ശ്രമമുണ്ടായിട്ടുണ്ട്. ഒറ്റപ്പെടുത്താമെന്ന് ആരെങ്കിലും വിചാരിക്കുന്നുണ്ടെങ്കില്‍ അവര്‍ക്ക് തെറ്റിപ്പോയി.' പിണറായിയുമായി വ്യക്തിപരമായ സൗഹൃദം ഉണ്ടായിരുന്നു. കേരളത്തില്‍ യു.ഡി.എഫ് അധികാരത്തില്‍ തിരിച്ചുവരും. ആരോഗ്യ മന്ത്രിക്കെതിരെ നിരന്തരം ആരോപണങ്ങള്‍ ഉന്നയിച്ച് വിവാദമായതിന് പിന്നാലെയാണ് മുല്ലപ്പള്ളിയുടെ മലക്കം മറിച്ചില്‍. പ്രതിപക്ഷ നേതാവിന്റെ ഉപവാസം ഉദ്ഘാടനം ചെയ്യവേയായിരുന്നു ആരോഗ്യമന്ത്രി കെ.കെ. ശൈലജയ്‌ക്കെതിരെ പരിഹാസം പേറുന്ന വിമര്‍ശനം മുല്ലപ്പള്ളി ചൊരിഞ്ഞത്.