കണ്ണുവച്ചവർക്ക് തക്കമറുപടി

ലഡാക്കിലെ ഇന്ത്യയുടെ ഭൂമിയിൽ ദുഷ്ടലാക്കോടെ കണ്ണുവച്ചവർക്ക് തക്കമറുപടി നൽകിയെന്ന് പ്രധാനമന്ത്രി നരേന്ദ്ര മോദി. രാജ്യത്തിന്‍റെ അഭിമാനത്തിനു മുറിവേൽക്കാൻ അനുവദിക്കില്ലെന്നു ധീരസൈനികർ കാണിച്ചുകൊടുത്തുവെന്നും മോദി പറഞ്ഞു. പ്രതിമാസ റേഡിയോ പ്രഭാഷണ പരിപാടി മൻ കി ബാത്തിൽ സംസാരിക്കുകയായിരുന്നു പ്രധാനമന്ത്രി. കിഴക്കൻ ലഡാക്കിൽ ചൈനയുമായുള്ള സംഘർഷം നിലനിൽക്കുമ്പോൾ അതിശക്തമായ വാക്കുകളോടെയാണ് പ്രധാനമന്ത്രി അതിനോടു പ്രതികരിച്ചത്. വിഷയത്തിൽ കോൺഗ്രസ് തുടർച്ചയായി കേന്ദ്ര സർക്കാരിനെ വിമർശിച്ചു വരിക കൂടിയാണ്. ഇന്ത്യയുടെ ഭൂപ്രദേശം ചൈന കൈയേറിയെന്നും അതു സർക്കാരിന്‍റെ പരാജയമെന്നും പ്രതിപക്ഷം വിമർശിക്കുന്നുണ്ട്. സൗഹൃദത്തിന്‍റെ ചൈതന്യം ഇന്ത്യ അ‍ംഗീകരിക്കുന്നു. എന്നാൽ, അതിനു വിരുദ്ധമായി പ്രവർത്തിക്കാൻ വന്നാൽ മടിച്ചുനിൽക്കാതെ ഉചിതമായ മറുപടി നൽകാനും ഇന്ത്യയ്ക്കു കഴിവുണ്ട്- ചൈനയുടെ പേരെടുത്തു പറയാതെ മോദി വ്യക്തമാക്കി. ഇന്ത്യയുടെ കരുത്തും അതിർത്തിയും പരമാധികാരവും സംരക്ഷിക്കാനുള്ള പ്രതിബദ്ധതയും ലോകം അറിഞ്ഞു- അദ്ദേഹം പറഞ്ഞു. ചൈനീസ് സേനയുമായുണ്ടായ ഏറ്റുമുട്ടലിൽ വീരമൃത്യു വരിച്ച 20 ഇന്ത്യൻ സൈനികർക്ക് ആദരാഞ്ജലികൾ അർപ്പിക്കുകയും ചെയ്തു പ്രധാനമന്ത്രി. പ്രാദേശികമായി നിർമിച്ച ഉത്പന്നങ്ങൾ ഉപയോഗിക്കാൻ പ്രധാനമന്ത്രി ജനങ്ങളോട് ആഹ്വാനം ചെയ്തു