കൊവിഡ് കാലത്ത് മലയാളി വിജയം

സുഭിക്ഷകേരളം പദ്ധതി 

  കൊവിഡ് കാലത്ത് സംസ്ഥാന സര്‍ക്കാര്‍ തുടക്കമിട്ടി സുഭിക്ഷകേരളം പദ്ധതിക്ക് വന്‍ സ്വീകരണം. 'സുഭിക്ഷകേരള'ത്തിന്റെ ഭാഗമായി 26,000 ഹെക്ടറില്‍ കൃഷി ചെയ്യാനുള്ള അപേക്ഷകള്‍ ലഭിച്ചു. ഒരു വര്‍ഷം കൂടുതലായി കൃഷി ചെയ്യാന്‍ ലക്ഷ്യമിട്ട 25,000 ഹെക്ടറാണു മൂന്നൂമാസം കൊണ്ടു മറികടന്നത്.ലഭിച്ച അപേക്ഷകളില്‍ 96000 പേര്‍ 45 വയസ്സില്‍ താഴെയുള്ളളരാണ്, 5600 പേര്‍ പ്രവാസികളും. യുവജനങ്ങളെ കൂടുതല്‍ മികച്ച രീതിയില്‍ കൃഷിക്കായി ഒരുക്കുന്നതിനായി വേണ്ട സജ്ജീകരണങ്ങള്‍ ഒരുക്കുകയാണ് സംസ്ഥാന സര്‍ക്കാര്‍. മണ്ണിന്റെ പ്രത്യേകതയും ഭൂമിയുടെ കിടപ്പും മുഖ്യമാനദണ്ഡങ്ങളാക്കി കേരളത്തിലെ കൃഷിഭൂമി 5 കാര്‍ഷിക-പരിസ്ഥിതി മേഖലകളാക്കി തരം തിരിച്ചു വിജ്ഞാപനം ചെയ്തു. ഈ വിഭജനത്തിന്റെ ഉദ്ദേശ്യലക്ഷ്യങ്ങള്‍ ഫലപ്രാപ്തിയിലെത്തിക്കാന്‍ കൂടിയാണു തോട്ടങ്ങളില്‍ പഴവും പച്ചക്കറിയും കൂടി കൃഷി ചെയ്യാനുള്ള ഭൂപരിഷ്‌കരണ നിയമഭേദഗതി വരുന്നത്. കേരള കാര്‍ഷിക സര്‍വകലാശാല, ആസൂത്രണ ബോര്‍ഡ് എന്നിവയുടെ സഹായത്തോടെ കൃഷിവകുപ്പ് നടത്തിയ സമഗ്ര പഠനത്തിന്റെ അടിസ്ഥാനത്തിലാണു നടപടി. രണ്ടു പ്രളയങ്ങള്‍ മണ്ണിലും പ്രകൃതിയിലും വരുത്തിയ മാറ്റവും നിരന്തരമായ കാലാവസ്ഥാ വ്യതിയാനവും കണക്കിലെടുത്തു കാര്‍ഷികാസൂത്രണത്തിലെ നിര്‍ണായക ചുവടുവയ്പായാണു പുതിയ പരിഷ്‌കാരം. മണ്ണിന്റെ ജൈവസ്വഭാവം, ഭൂമിയുടെ ഘടന, ഓരോ പ്രദേശത്തെയും പ്രകൃതി, കാലാവസ്ഥ, മണ്ണിലുളള സൂക്ഷ്മ മൂലകങ്ങള്‍ തുടങ്ങിയവ ശാസ്ത്രീയമായി അപഗ്രഥനം ചെയ്താണു നടപടി സ്വീകരിച്ചത്. തീരമേഖല, ഉള്‍നാടന്‍ മേഖല, താഴ്വാരമേഖല, മലയോരമേഖല, പാലക്കാടന്‍ സമതലം എന്നിവയാണ് 5 മേഖലകള്‍. ഇവയ്ക്കു കീഴില്‍ 23 കാര്‍ഷിക-പരിസ്ഥിതി യൂണിറ്റുകളും രൂപീകരിച്ചു. ഭൂമിക്ക് അനുയോജ്യമായ വിള എന്നതു യാഥാര്‍ഥ്യമാക്കുകയാണു ലക്ഷ്യം . ഓരോ മേഖലയിലും യൂണിറ്റിലും കൃഷി ചെയ്യാവുന്നതും പാടില്ലാത്തതുമായ വിളകളുടെ പട്ടിക തയാറാക്കി. ഏതെങ്കിലും മേഖലയില്‍ ഏതെങ്കിലും വിള കൃഷി ചെയ്യുന്നതു വിലക്കാന്‍ ഉദ്ദേശിക്കുന്നില്ല. എന്നാല്‍ ഈ വിഭജനം മുന്‍നിര്‍ത്തിയുള്ള കൃഷിക്കായിരിക്കും അതതു മേഖലകളില്‍ ഇനി പ്രോത്സാഹനം. ഉദ്യോഗസ്ഥര്‍ക്ക് ഇതിനുള്ള ബോധവല്‍ക്കരണം ആരംഭിച്ചു. കാര്‍ഷികരംഗത്തെ ആഗോള മാറ്റങ്ങളുടെ ചുവടുപിടിച്ചുള്ള ശാസ്ത്രീയ കൃഷി രീതിയിലേക്കു മാറിയാലേ കേരളത്തിന്റെയും കര്‍ഷകരുടെയും ഭാവി ഭദ്രമാകൂവെന്ന് ആസൂത്രണബോര്‍ഡും കാര്‍ഷിക സര്‍വകലാശാലയും ചൂണ്ടിക്കാട്ടിയിട്ടുണ്ട്.