കേന്ദ്രം അമിത ലാഭം ഉപേക്ഷിച്ചാല്‍ ഒഴിവാക്കാം തീവില

 

കൊവിഡ് കാലത്ത് തുടര്‍ച്ചയായ 20-ാം ദിവസവും പെട്രോള്‍ ഡീസല്‍ വിലയില്‍ ഉയര്‍ച്ച. എന്നാല്‍ കൊവിഡ്കാലത്ത് അമിത നികുതിയിലൂടെ കൊയ്യാന്‍തീരുമാനിച്ച ലാഭം വേണ്ടന്ന് വെച്ചാല്‍ തന്നെ ജനത്തിന് കുറച്ച് ആശ്വാസമാവും . ലോക്ഡൗണ്‍ കാലത്ത് വില ഇടിഞ്ഞപ്പോള്‍ എക്സൈസ് ഡ്യൂട്ടി സര്‍ക്കാര്‍ കൂട്ടിയിരുന്നു. ഇത് പിന്‍വലിക്കാനും കേന്ദ്ര സര്‍ക്കാര്‍ ഇനിയും തയ്യാറായിട്ടില്ല.

പെട്രോളിന് 21 പൈസയും ഡീസലിന് 17 പൈസയുമാണു ഇന്നു കൂടിയത്. ഴിഞ്ഞ 20 ദിവസത്തെ പെട്രോള്‍ വിലയില്‍ ഉണ്ടായ വര്‍ധന 8.88 രൂപയും ഡീസലില്‍ 10.22 രൂപയുമാണ്. 17 ദിവസം പെട്രോളിനും ഡീസലിനും വില ഉയര്‍ന്ന ശേഷം ബുധനാഴ്ച ഡീസലിനു മാത്രം വില വര്‍ധിക്കുകയായിരുന്നു. അന്താരാഷ്ട്ര വിപണിയില്‍ ഇന്ധന വില ബാരലിന് 45 ഡോളറാണ്. ആറു കൊല്ലം മുമ്പ് ഇത് 140 ഡോളറായിരുന്നു. അന്ന് എണ്‍പതില്‍ താഴെയായിരുന്നു എണ്ണ വില. എന്നാല്‍ ഇപ്പോള്‍ അതിന്റെ മൂന്നിലൊന്ന് മാത്രമേ ഇന്ധനത്തിന് ആഗോള വിപണിയില്‍ വിലയുള്ളൂ. അപ്പോഴും രാജ്യത്ത് എണ്ണ വില ഉയര്‍ന്നു നല്‍ക്കുന്നു. ഇന്ധന വില ദിവസവും വര്‍ധിപ്പിക്കുന്ന അനുഭവം പുതിയതാണ്. അന്താരാഷ്ട്രവിപണിയില്‍ ക്രൂഡ് ഓയില്‍ വില വര്‍ധിക്കുമ്പോഴാണ് സാധാരണ നിലയില്‍ ഇന്ധന വില വര്‍ധിപ്പിക്കുക. ജൂണ്‍ ഏഴ് മുതലാണ് ഇന്ധന വില ഉയരാന്‍ തുടങ്ങിയത്. ഇതിനിടയില്‍ അന്താരാഷ്ട്ര വിപണിയില്‍ എണ്ണ വില കുറഞ്ഞിട്ടും ഇന്ധന വില വര്‍ധിപ്പിച്ചിരുന്നു.കൊവിഡിന്റെ പശ്ചാത്തലത്തില്‍ അസംസ്‌കൃത എണ്ണവില ചരിത്രത്തിലെ ഏറ്റവും വലിയ ഇടിവ് നേരിട്ടിരുന്നു. ലോക്ക് ഡൗണിന് ശേഷം രാജ്യങ്ങള്‍ തുറന്നതോടെ രാജ്യാന്തര തലത്തില്‍ എണ്ണവില കൂടാനും തുടങ്ങി. ലോക്ക് ഡൗണ്‍ മൂലമുണ്ടായ വന്‍ നഷ്ടം നികത്താനായി വരും മാസങ്ങളിലും രാജ്യത്ത് എണ്ണവില കമ്പനികള്‍ ഉയര്‍ത്താനാണ് സാധ്യത. അന്താരാഷ്ട്ര തലത്തില്‍ എണ്ണവില കുറഞ്ഞതും രാജ്യവ്യാപക അടച്ചുപൂട്ടലും കാരണം 82 ദിവസത്തോളം ഇന്ധനവില മാറ്റമില്ലാതെ തുടര്‍ന്നിരുന്നു. പിന്നീടാണ് ജൂണ്‍ ഏഴ് മുതല്‍ വില വര്‍ധിപ്പിക്കാന്‍ തുടങ്ങിയത്.