90 ലക്ഷം കൊവിഡ് രോഗികള്‍

  ലോകത്താകെ ഇതുവരെ 90 ലക്ഷമാളുകള്‍ക്ക് കൊവിഡ് സ്ഥിരീകരിച്ചു. 48 ലക്ഷം പേര്‍ രോഗമുക്തരായി. 4,70,000 പേര്‍ മരിച്ചു. 4,70,000 കൊവിഡ് നിയന്ത്രണവിധേയമായ ചൈനയിലും ദക്ഷിണ കൊറിയയിലും വീണ്ടും രോഗവ്യാപനമുണ്ടാകുന്നത് ആശങ്കയുണ്ടാക്കുന്നു. ചൈനയില്‍ 25 പേര്‍ക്കുകൂടി കൊവിഡ് സ്ഥിരീകരിച്ചു. ഇതില്‍ 22 പേര്‍ ബീജിങ്ങില്‍നിന്നും മൂന്നു പേര്‍ ഹുബെ പ്രവിശ്യയില്‍നിന്നുമാണ്. ബീജിങ്ങില്‍ പുതിയതായി വൈറസ് വ്യാപനമുണ്ടായതിനാല്‍ ഇതുവരെ 23 ലക്ഷം ആളുകളുടെ സ്രവം പരിശോധിച്ചു. ദക്ഷിണ കൊറിയയില്‍ 48 പേര്‍ക്കുകൂടി രോഗം. ഇതില്‍ പകുതിയും തലസ്ഥാനമായ സിയോളിലാണ്. ദക്ഷിണാഫ്രിക്ക, ബ്രസീല്‍, അമേരിക്ക എന്നിവിടങ്ങളില്‍ രോഗികള്‍ വര്‍ധിക്കുകയാണ്. ദക്ഷിണാഫ്രിക്കയില്‍ ഒരു ദിവസം 4966 പുതിയ രോഗികള്‍. ഒരു ദിവസത്തെ ഏറ്റവുമുയര്‍ന്ന കണക്കാണിത്. ആകെ മരണം 1900. രോഗികള്‍ വര്‍ധിക്കുമ്പോഴും ലോക്ഡൗണില്‍ ഇളവ് പ്രഖ്യാപിക്കുകയാണ് സിറില്‍ റാമഫോസ സര്‍ക്കാര്‍. ബ്രസീലില്‍ രോഗബാധിതര്‍ പത്തു ലക്ഷം കവിഞ്ഞു. മൂന്നു മാസത്തിനുള്ളില്‍ 50,000 മരണമുണ്ടായിട്ടും കൊവിഡ് നിയന്ത്രണങ്ങള്‍ നടപ്പാക്കാന്‍ പ്രസിഡന്റ് ജെയര്‍ ബോള്‍സനാരോ തയ്യാറാകുന്നില്ല. പലസ്തീനിലെ വെസ്റ്റ് ബാങ്കില്‍ 86 പേര്‍ക്കുകൂടി രോഗം സ്ഥിരീകരിച്ചതോടെ കടുത്ത നിയന്ത്രണം ഏര്‍പ്പെടുത്തി. ഹിബ്രോണിലേക്ക് ഗതാഗതസൗകര്യം നിര്‍ത്തി. അഞ്ചു ദിവസം കര്‍ഫ്യു ഏര്‍പ്പെടുത്തി. നാബുലസ് നഗരം രണ്ടു ദിവസത്തേക്ക് നിരീക്ഷണത്തിലാക്കി. ജര്‍മനിയില്‍ 687 രോഗികള്‍ കൂടി. ഒരു മാസത്തിനിടെയുള്ള ഏറ്റവുമുയര്‍ന്ന കണക്കാണിത്. സ്പെയിനില്‍ ബ്രിട്ടീഷ് വിനോദസഞ്ചാരികള്‍ക്ക് ഏര്‍പ്പെടുത്തിയ 14 ദിവസത്തെ നിരീക്ഷണ കാലയളവ് നീക്കി. നിയന്ത്രണങ്ങളില്‍ ഇളവുവരുത്തുന്നത് അടുത്തയാഴ്ച അറിയിക്കുമെന്ന് ബ്രിട്ടീഷ് പ്രധാനമന്ത്രി ബോറിസ് ജോണ്‍സണ്‍ പറഞ്ഞു.