മൂന്നു കൊവിഡ് രോഗികള്‍ക്കെതിരെ കേസ്

ആരോഗ്യപ്രവര്‍ത്തകരുടെ നിര്‍ദ്ദേശങ്ങള്‍ നിരന്തരം ലംഘിച്ച മൂന്ന് കൊവിഡ് രോഗികള്‍ക്കെതിരെ കാളികാവ് പൊലീസ് കേസെടുത്തു. കാളികാവിലെ അല്‍ സഫ ആശുപത്രിയില്‍ കഴിയുന്ന ഇവര്‍ മാസ്‌ക് ധരിക്കാന്‍ പോലും തയ്യാറാവുന്നില്ലെന്ന ആരോഗ്യപ്രവര്‍ത്തകരുടെ പരാതിയിലാണ് പൊലീസ് നടപടി. മറ്റ് മുറികളിലെ രോഗികളെയും കൊവിഡ് പ്രോട്ടോക്കോള്‍ ലംഘിക്കാന്‍ നിര്‍ബന്ധിക്കുന്നതിന് ഇവര്‍ പ്രത്യേക വാട്‌സ് ആപ്പ് ഗ്രൂപ്പ് ഉണ്ടാക്കിയതായും ആരോഗ്യ പ്രവര്‍ത്തകര്‍ പറയുന്നു. ആരോഗ്യനില മെച്ചപ്പെട്ടതിന് പിന്നാലെ കൊവിഡ് പ്രത്യേക ആശുപത്രിയായ മഞ്ചേരി മെഡിക്കല്‍ കോളേജില്‍ നിന്ന് സഫ ആശുപത്രിയിലേക്ക് മാറ്റിയവരായിരുന്നു ഇവര്‍. മഞ്ചേരിയില്‍ ഗുരുതര രോഗികളെയും ഗര്‍ഭിണികളെയുമാണ് ചികിത്സിക്കുന്നത്. ഭക്ഷണകാര്യത്തിലും പരിശോധനാ ഫലങ്ങള്‍ വൈകുന്നതിലും ഇവര്‍ ആരോഗ്യപ്രവര്‍ത്തകരോട് തര്‍ക്കിക്കാറുണ്ട്. ഇവര്‍ക്കായി പുറത്തുനിന്ന് കൊണ്ടുവന്ന പൊരിച്ച മാംസങ്ങളുള്ള ഭക്ഷണം സ്വീകരിക്കാന്‍ ആശുപത്രി അധികൃതര്‍ തയ്യാറായിരുന്നില്ല. കൊവിഡ് രോഗികള്‍ക്കുള്ള ഭക്ഷണ മെനു പാലിക്കാന്‍ മൂന്നുപേരും തയ്യാറല്ലായിരുന്നു. കേസിന് പിന്നാലെ ഇവരെ മഞ്ചേരി മെഡിക്കല്‍ കോളേജിലേക്ക് മാറ്റി. കേരളത്തില്‍ രോഗബാധ വര്‍ദ്ധിക്കുന്നതിനിടയിലാണ് ഈ നടപടി. രോഗികളെ ബോധവത്കരിക്കുന്നതിന് വേണ്ട നടപടികള്‍ സ്വീകരിക്കാന്‍ ജില്ലാ കളകറ്റര്‍മാര്‍ക്ക് നിര്‍ദേശം നല്‍കിയിട്ടുണ്ട്. ഇതിനിടെ എറണാകുളം ജില്ലയില്‍ ആശങ്ക വര്‍ധിപ്പിച്ച് സമ്പര്‍ക്കത്തിലൂടെ കോവിഡ് രോഗം സ്ഥിരീകരിക്കുന്നവരുടെ എണ്ണം കൂടുന്നു. ഞായറാഴ്ച കോവിഡ് സ്ഥിരീകരിച്ച നായരമ്പലം സ്വദേശിയായ 43 വയസ്സുകാരന് രോഗം ബാധിച്ചതിന്റെ ഉറവിടം കണ്ടെത്താന്‍ ആരോഗ്യവകുപ്പിനു കഴിഞ്ഞിട്ടില്ല. പനി ബാധിച്ചു നാല് ദിവസം മുന്‍പാണ് നായരമ്പലത്തെ സ്വകാര്യ ആശുപത്രിയില്‍ ചികിത്സ തേടിയത്. പിന്നീട് കലൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. തുടര്‍ന്ന് നടത്തിയ സ്രവ പരിശോധനയില്‍ ആണ് കോവിഡ് സ്ഥിരീകരിച്ചത്. കോവിഡ് ലക്ഷണങ്ങളുമായി മറ്റൊരാള്‍ കൂടി നായരമ്പലത്തെ സ്വകാര്യ ആശുപത്രിയില്‍ ഇന്ന് ചികിത്സ തേടിയിട്ടുണ്ട്. ഇയാളുടെ സ്രവ സാംപിളുകള്‍ പരിശോധനയ്ക്ക് അയച്ചു. കഴിഞ്ഞ രണ്ടാഴ്ചയ്ക്കുള്ളില്‍ പനി, ശ്വാസ തടസ്സം അടക്കം രോഗ ലക്ഷ്യങ്ങളുമായി നായരമ്പലം ഭാഗത്ത് നിന്നു ചികിത്സ തേടിയവരുടെ വിശദാംശങ്ങള്‍ ആരോഗ്യ വകുപ്പ് ശേഖരിച്ചു തുടങ്ങി. ഞായറാഴ്ച രോഗം സ്ഥിരീകരിച്ച ആള്‍ നായരമ്പലം വിട്ടു കഴിഞ്ഞ ഒരു മാസത്തിനുള്ളില്‍ യാത്ര ചെയ്തിട്ടില്ല. കഴിഞ്ഞ ദിവസം കോവിഡ് സ്ഥിരീകരിച്ച കളമശ്ശേരിയിലെ പൊലീസുകാരന്റെ വൈറസ് ബാധയുടെ ഉറവിടവും കണ്ടെത്താനായിട്ടില്ല.