റീഡിങ് നഗരത്തിൽ കത്തിയാക്രമണം

ലണ്ടനു സമീപം റീഡിങ് നഗരത്തിൽ കത്തിയാക്രമണം. ചുരുങ്ങിയത് മൂന്നു പേർ മരിച്ചതായും നിരവധി പേർക്കു പരുക്കേറ്റതായും റിപ്പോർട്ട്. ഭീകരാക്രമണ സാധ്യതയും അന്വേഷിക്കുകയാണെന്നു പൊലീസ്. ഒരു ലിബിയൻ വംശജനെ സംശയാസ്പദമായി അറസ്റ്റ് ചെയ്തിട്ടുണ്ട്. പരുക്കേറ്റ നിരവധി പേരെ ആശുപത്രിയിൽ എത്തിച്ചതായി പൊലീസ് പ്രസ്താവനയിൽ പറഞ്ഞു. നഗരത്തിലെ സെൻട്രൽ പാർക്കിലാണ് ആക്രമണമുണ്ടായത്. പൊലീസ് പ്രദേശം വളഞ്ഞ് അന്വേഷണം നടത്തി. റോഡുകൾ ബ്ലോക്ക് ചെയ്താണ് അന്വേഷണം. സംഭവത്തിൽ നടുക്കം പ്രകടിപ്പിച്ച ബ്രിട്ടീഷ് പ്രധാനമന്ത്രി ബോറിസ് ജോൺസൺ ഉടൻ സ്ഥലത്തെത്തി ദുരന്തവ്യാപ്തി കുറച്ച പൊലീസിനെ അഭിനന്ദിക്കുകയും ചെയ്തു. ആഭ്യന്തര സെക്രട്ടറി പ്രീതി പട്ടേലും ആശങ്ക രേഖപ്പെടുത്തിയിട്ടുണ്ട്. പരുക്കേറ്റ നിരവധിയാളുകളെ പാർക്കിൽ നിന്ന് ആശുപത്രിയിലേക്കു കൊണ്ടുപോകുന്നതിന്‍റെ ദൃശ്യങ്ങൾ സോഷ്യൽ മീഡിയയിൽ നിറയുകയാണ്. പ്രദേശത്ത് നേരത്തേ കറുത്തവർഗക്കാരുടെ പ്രക്ഷോഭം നടന്നിരുന്നു. എന്നാൽ, അതു കഴിഞ്ഞ് മണിക്കൂറുകൾക്കു ശേഷമാണ് ആക്രമണമുണ്ടായത്. രണ്ടും തമ്മിൽ ബന്ധമുണ്ടെന്ന് ഇപ്പോൾ പറയാനാവില്ലെന്നു പൊലീസ്.