മുല്ലപ്പള്ളിയെ പടിയിറക്കാന്‍ അണിയറഅങ്കം

ഭഗവതി പുത്തന്‍ സര്‍ക്കാരിനെതിരെ കിട്ടാവുന്ന വടിയെടുത്ത് ആഞ്ഞടിക്കുന്നതിനിടയില്‍ സെല്‍ഫ് ഗോളടിച്ച കെപിസിസി പ്രസിഡന്റ് മുല്ലപ്പള്ളി രാമചന്ദ്രന് മിക്കവാറും വനവാസമാവും കേരളരാഷ്ട്രീയത്തില്‍ സ്വന്തം പാട്ടിക്കാര്‍ വിധിക്കുക . നാവു പിഴച്ച് അടിതെറ്റിവീണ കെ പി സി അദ്ധ്യക്ഷനെ കൈ പിടിച്ച് ഉയര്‍ത്തുന്നതിന് പകരം ആസ്ഥാനം നേടിയെടുക്കാന്‍ എ ഗ്രൂപ്പ് നീക്കം തുടങ്ങി. കഴിഞ്ഞ ദിവസം കേരളത്തിലെ ഒരു പ്രമുഖപത്രം മുല്ലപ്പളിക്കെതിരെ എഡിറ്റോറിയലുമായി രംഗത്തുവന്നത് ഇതിന്റെ ഭാഗമായിട്ടാണ്. നിലവില്‍ പിന്‍വലിഞ്ഞ് നില്‍ക്കുന്ന മുന്‍ മുഖ്യമന്ത്രി ഉമ്മന്‍ ചാണ്ടിയെ രംഗത്ത് ഇറക്കാനാണ് ആലോചന. ഉമ്മന്‍ ചാണ്ടി നയിക്കുന്ന കോണ്‍ഗ്രസിന് പിണറായിയെ പ്രതിരോധിക്കാന്‍ കഴിയും എന്നാണ് ഇക്കൂട്ടരുടെ വാദം. നിലവിലെ ഉമ്മന്‍ചാണ്ടിയുടെ അനാരോഗ്യം ഒരു പ്രശ്‌നമാണ്. എന്നാല്‍ കെ സി ജോസഫ് അടക്കമുള്ളവര്‍ ഇതിനുവേണ്ടിയുള്ള ശ്രമത്തിലാണ്. തങ്ങളുടെ എല്ലാ ആയുധങ്ങളും മുല്ലപ്പള്ളി കളഞ്ഞു കുളിച്ചു എന്നതാണ് യുവ നേതാക്കള്‍ അടക്കം ഉന്നയിക്കുന്ന വിമര്‍ശനം. എ ഐ സി സി യെ എതിര്‍പ്പ് അറിയിച്ചു കഴിഞ്ഞു. മുല്ലപ്പള്ളിയെ പിന്തുണയ്ക്കാന്‍ മറ്റ് പ്രമുഖ നേതാക്കളോ, യുഡിഎഫ് നേതാക്കളോ ഇതുവരെ തയാറായിട്ടുമില്ല. കൊവിഡ് കാല വാര്‍ത്താസമ്മേളനത്തില്‍ രാഷ്ട്രീയം പറയാതിരുന്ന മുഖ്യമന്ത്രി പിണറായി വിജയന്‍ ആ പതിവ് മാറ്റിവച്ച് മുല്ലപ്പള്ളിയെ മാത്രമല്ല, പ്രതിപക്ഷത്തെയാകെ പ്രതിക്കൂട്ടിലാക്കി ആഞ്ഞടിച്ചു. പിണറായി വിജയന് ആഞ്ഞടിക്കാനുള്ള വടി സ്വയം സംഭാവന ചെയ്യുകയായിരുന്നു കെപിസിസി പ്രസിഡന്റ് എന്നാണ് വിലയിരുത്തല്‍. പ്രതിപക്ഷ നേതാവ് രമേശ് ചെന്നിത്തല പതിവ് പത്രസമ്മേളനം ശനിയാഴ്ച ഒഴിവാക്കി. യുഡിഎഫ് കണ്‍വീനര്‍ ബെന്നി ബഹനാന്‍ വ്യക്തിപരമായി ആക്ഷേപിക്കുന്നതിനെതിരെ രംഗത്തുവന്നപ്പോള്‍ മറ്റു കോണ്‍ഗ്രസ് നേതാക്കള്‍ ഒഴിഞ്ഞുമാറുന്നതാണ് കാണാനായത്. പ്രതിപക്ഷനേതാവ് രമേശ് ചെന്നിത്തല ആരോഗ്യമന്ത്രിക്ക് മീഡിയാ മാനിയയാണെന്ന് നിയമസഭയില്‍ ആക്ഷേപിച്ചതിനെതിരെ കേരളീയ പൊതുസമൂഹത്തില്‍ നിന്നുയര്‍ന്ന പ്രതിഷേധത്തിന്റെ ചൂടും സൈബറിടങ്ങളിലെ ആക്രമണവും കഷ്ടിച്ച് മറികടക്കുന്നതിനിടയിലാണ് 'കൊവിഡ് റാണി, നിപ രാജകുമാരി' തുടങ്ങിയ പ്രയോഗങ്ങളിലൂടെ മുല്ലപ്പള്ളി യുഡിഎഫിനെ ഞെട്ടിച്ചത്. വൈദ്യുതി നിരക്ക് വര്‍ധന, പ്രവാസികള്‍ക്ക് കൊവിഡ് സര്‍ട്ടിഫിക്കറ്റ് നിര്‍ബന്ധമാക്കല്‍ തുടങ്ങിയ കാര്യങ്ങളില്‍ പ്രതിരോധത്തിലാവേണ്ടിവന്ന സിപിഎമ്മിന് അപ്രതീക്ഷിതമായി കിട്ടിയ ആയുധമായി മുല്ലപ്പള്ളിയുടെ പരാമര്‍ശം. ആരോഗ്യ മന്ത്രി കെ.കെ ശൈലജയ്‌ക്കെതിരെയുണ്ടായ മോശം പരാമര്‍ശത്തിനെതിരെ പ്രതിഷേധം ശക്തമാകുന്നതിനിടെ, ശാന്തമായി മാത്രം മാധ്യമ പ്രവര്‍ത്തകരോട് ഇടപഴകുന്ന മുല്ലപ്പള്ളി ഇന്നലെ ചോദ്യങ്ങളോട് ക്ഷുഭിതനായാണ് പ്രതികരിച്ചത്. പരാമര്‍ശങ്ങളില്‍ ഉറച്ചു നില്‍ക്കുന്നുവെന്നും അതില്‍ ഒരു തെറ്റുമില്ലെന്നും മുല്ലപ്പള്ളി ആവര്‍ത്തിക്കുന്നു. അതിനിടെ, മുല്ലപ്പള്ളിയുടെ ആവര്‍ത്തിച്ചുള്ള പരാമര്‍ശങ്ങള്‍ കോണ്‍ഗ്രസിനേയും യുഡിഎഫിനേയും പ്രതിസന്ധിയിലാക്കി. ഒരു വനിത പ്രസിഡന്റായ കോണ്‍ഗ്രസിന് എങ്ങനെ ഇത്തരമൊരു സ്ത്രീ വിരുദ്ധ പ്രസംഗം നടത്താനാവുമെന്ന ചോദ്യമുയര്‍ത്തി ഇടതുപക്ഷം കളം നിറയുകയാണ്. അതിനിടെ, നിപ്പയുടെ രക്തസാക്ഷി നഴ്‌സ് ലിനിയുടെ ഭര്‍ത്താവ് സജീഷ് രംഗത്തുവന്നത് മുല്ലപ്പള്ളിയെ കൂടുതല്‍ പ്രതിരോധത്തിലാക്കി. വടകര എംപിയുടെ പ്രദേശമായിരുന്നിട്ടും എംപി തിരിഞ്ഞുനോക്കുകയോ ബന്ധപ്പെടുകയോ ചെയ്തില്ലെന്നായിരുന്നു സജീഷ് കുറ്റപ്പെടുത്തിയത്. അതിന് പ്രാദേശിക കോണ്‍ഗ്രസ് നേതാവിനെക്കൊണ്ട് മറുപടി പറഞ്ഞതിലൊതുക്കാതെ സജീഷ് ജോലി ചെയ്യുന്ന പ്രാഥമികാരോഗ്യകേന്ദ്രത്തിലേക്ക് കോണ്‍ഗ്രസ് കൊവിഡ് പ്രകടനം നടത്തിയത് പാര്‍ട്ടിയെ പ്രതിക്കൂട്ടിലാക്കി. ആ കുടുംബത്തെ നമ്മുടെ കുടുംബം എന്ന നിലയിലാണ് എല്ലാവരും കാണുന്നതെന്ന് ചൂണ്ടിക്കാട്ടിയ മുഖ്യമന്ത്രി കേരളം മുഴുവന്‍ അങ്ങനെയാണ് കാണുന്നത്, അതിനെ അംഗീകരിക്കണം എന്ന് നിര്‍ബന്ധിക്കുന്നില്ല, ആ കുടുംബത്തെ വേട്ടയാടാതിരുന്നു കൂടേ എന്നു ചോദിക്കുമ്പോള്‍ അതിന് മറുപടി പറയാന്‍ കേരളത്തിലെ കോണ്‍ഗ്രസ് നേതാക്കള്‍ക്ക് കഴിയുന്നില്ല.