മാനന്തവാടിയുടെ മനം കീഴടക്കി സുനീര്‍

  രാഹുലന്റെ സ്ഥാനാര്‍ഥിത്വം ആഘോഷിക്കുന്നവരോട് കുറിക്കുകൊള്ളുന്ന ചോദ്യങ്ങളുമായി മാനന്തവാടി മണ്ഡലത്തില്‍ എല്‍ഡിഎഫ് സ്ഥാനാര്‍ഥി പി പി സുനീറിന്റെ പര്യടനം. സാമ്രാജ്യത്വ വിരുദ്ധ പേരാട്ട ഭൂമിയില്‍ വോട്ടര്‍മാരുടെ സ്‌നേഹാദരങ്ങള്‍ ഏറ്റുവാങ്ങിയയായിരുന്നു പര്യടനം. മണ്ഡലത്തില്‍ എല്‍ഡിഎഫിന്റെ മുന്‍തൂക്കം വിളബംരചെയ്യുന്നതായിയിരുന്നു സ്വീകരണങ്ങള്‍. രാഹുല്‍ഗാന്ധിയുടെ സ്ഥാനാര്‍ഥിത്വം ഒരു ആശങ്കയും സൃഷ്ടിച്ചിട്ടില്ലെന്നും ആശങ്കപ്പെടേണ്ടത് രാഹുലാണെന്നും പ്രഖ്യപിച്ചായിരുന്നു സുനീറിന്റെ പര്യടനം. രാ വിലെ എട്ട് മുതല്‍ ആരംഭിച്ച പര്യടനം 25ലധികം കേന്ദ്രങ്ങള്‍ പിന്നിട്ട് രാത്രി വൈകിയാണ് സമാപിച്ചത്. ചുട്ടുപൊള്ളുന്ന വെയിലിനെ അവഗണിച്ച് ആദിവാസി മേഖലകളിലടക്കം നിരവധി സ്ത്രീകളും കുട്ടികളുമടങ്ങിയ ജനാവലിയാണ് സ്ഥാനാര്‍ഥിയെ സ്വീകരിക്കാനെത്തിയത്. ദേശീയ ശ്രദ്ധയാകര്‍ഷിക്കുന്ന മത്സരമായി മാറിയതോടെ ആജ് തക്, എന്‍ഡിടിവി തുടങ്ങി ദേശീയചാനലുകളടക്കം പര്യടനവേളയില്‍ സുനീറിനെ അനുഗമിച്ചു. ചാനലുകള്‍ക്ക് മുന്നില്‍ തെളിച്ചമാര്‍ന്ന നിലപാടുകള്‍ അറിയിച്ചും വോട്ടര്‍മാര്‍ക്ക് മുന്നില്‍ രാഹുലിന്റെ സ്ഥാനാര്‍ഥിത്വത്തിന്റെ യാഥാര്‍ഥ്യം തുറന്നുകാട്ടിയും തികഞ്ഞ ആത്മവിശ്വാസത്തോടെയായിരുന്നു സുനിറിന്റെ മുന്നേറ്റം. കൂമ്പാരക്കുനിയില്‍ തെരഞ്ഞെടുപ്പ് പര്യടനം ഒ ആര്‍ കേളു എംഎല്‍എ ഉദ്ഘാടനം ചെയ്തു. എന്‍ രാഘവന്‍ അധ്യക്ഷനായി. ഹരീന്ദ്രന്‍ സ്വാഗതം പറഞ്ഞു. പനവല്ലി, വെള്ളാഞ്ചേരി, ബാവലി, പാല്‍വെളിച്ചം, നീര്‍വാരം,നടവയല്‍, കൂളിവയല്‍, കെല്ലൂര്‍, തോണിച്ചാല്‍, തേറ്റമല, മൊതക്കര, വെള്ളമുണ്ട പത്താം മൈല്‍, നിരവില്‍പുഴ, കരിമ്പില്‍, ഇരുമനത്തൂര്‍, ആലാറ്റില്‍, വള്ളിത്തോട്, തവിഞ്ഞാല്‍, മക്കിമല, ചിറക്കര, പ്രിയദര്‍ശിനി, പിലാക്കാവ്, ഇല്ലത്ത് മൂല, പാണ്ടിക്കടവ് എന്നിവിടങ്ങളില്‍ സ്വീകരണം ലഭിച്ചു.