കരിപ്പൂര്‍ വിമാനത്താവളത്തിലെ ബാഗേജ് മോഷണം : പിന്നില്‍ അന്താരാഷ്ട്ര ബന്ധമുള്ള സംഘമെന്ന് സൂചന

കോഴിക്കോട് കരിപ്പൂര്‍ അന്താരാഷ്ട്ര വിമാനത്താവളത്തില്‍ യാത്രക്കാരുടെ ബാഗേജിലെ മോഷണത്തിന് പിന്നില്‍ അന്താരാഷ്ട്ര ബന്ധമുള്ള സംഘമാണെന്ന് സൂചന. ബാഗേജുകളില്‍ കണ്ട ചില അടയാളങ്ങളുടെ അടിസ്ഥാനത്തിലാണ് ദുബായ് കേന്ദ്രീകരിച്ചു പ്രവര്‍ത്തിക്കുന്ന സംഘത്തിന്റെ അനുയായികളാണെന്ന് സംശയം ബലപ്പെട്ടിരിക്കുന്നത്.

നവമാധ്യമങ്ങളിലടക്കം വിഷയം ചര്‍ച്ചയായതോടെയാണ് അന്വേഷണം തുടങ്ങിയിരിക്കുന്നത്. ഇതിന്റെ ഭാഗമായി ദുബായ് വിമാനത്താവളത്തിലെ എക്‌സറെ വിഭാഗത്തില്‍ പ്രവര്‍ത്തിക്കുന്നവരും കരിപ്പൂര്‍ വിമാനത്താവളത്തിലെ ഗ്രൗണ്ട്സ്റ്റാഫും തമ്മിലുള്ള ബന്ധമാണ് ഇപ്പോള്‍ അധികൃതര്‍ അന്വേഷിക്കുന്നത്.

എക്‌സറെ വിഭാഗത്തില്‍ ജോലി ചെയ്യുന്നവര്‍ക്ക് ഇതില്‍ എന്താണുള്ളതെന്ന് അറിയുവാന്‍ സാധിക്കും. ഇത്തരത്തില്‍ വിലപിടിപ്പുള്ള വസ്തുക്കള്‍ ശ്രദ്ധയില്‍ പെട്ടാല്‍ പെട്ടിയില്‍ പ്രത്യേക അടയാളം ഇടുകയും ചെയ്യും നാട്ടില്‍ എത്തുമ്പോള്‍ അടയാളമിട്ട ബാഗേജുകള്‍ മാറ്റിവയ്ക്കുകയും സംഘാംഗങ്ങള്‍ ബാഗേജുകള്‍ തുറന്ന് കൈക്കലാക്കുകയും ചെയ്യും. ഇതിനായി ബാഗുകളിലെ താഴുകള്‍ പൊട്ടിക്കുവാന്‍ വരെ തയ്യാറാകുന്നുവെന്നാണ് പരാതി വന്നിട്ടുള്ളത്.