‘ജറുസലേം’ ഗാസയിലും വെസ്റ്റ് ബാങ്കിലും സംഘര്‍ഷം : സമാധാന ആഹ്വാനവുമായി പ്രസിഡന്റ് ഡൊണാള്‍ഡ് ട്രംപ്

ജറുസലേമിനെ ഇസ്രയേല്‍ തലസ്ഥാനമായി പ്രഖ്യാപിച്ചതിനു പിന്നാലെ അക്രമാസക്തമായ ഗാസ, വെസ്റ്റ് ബാങ്ക് മേഖലയില്‍ സമാധാന ആഹ്വാനവുമായി പ്രസിഡന്റ് ഡൊണാള്‍ഡ് ട്രംപ് . ജറുസലേമിനെ തലസ്ഥാനമാക്കുന്നത് ശരിയായ തീരുമാനമാണെന്നും ഇസ്രയേലും പലസ്തീനും തമ്മില്‍ സുദീര്‍ഘമായ സമാധാന ഉടമ്പടി ഒപ്പുവയ്ക്കുന്നതില്‍ യു.എസ് പ്രതിജ്ഞാബന്ധമാണെന്നും വൈറ്റ് ഹൗസ് പ്രിന്‍സിപ്പല്‍ ഡപ്യൂട്ടി പ്രസ് സെക്രട്ടറി രാജ് ഷാ വ്യക്തമാക്കി.

മധ്യപൂര്‍വേഷ്യയില്‍ സമാധാനത്തിന് ഇടനിലക്കാരനായി പ്രവര്‍ത്തിക്കുന്നുവെങ്കില്‍ അക്കാര്യത്തില്‍ സത്യസന്ധത പാലിക്കേണ്ടതുണ്ട്. തലസ്ഥാനം ജറുസലേമാണെന്ന സത്യം അംഗീകരിക്കുക എന്നത് അതിന്റെ ആദ്യപടിയാണെന്നും ഷാ കൂട്ടിച്ചേര്‍ത്തു. എന്നാല്‍, ജറുസലേം തീരുമാനത്തില്‍ ഇടപെടാനാകില്ലെന്ന് യു.എന്‍ സുരക്ഷാ കൗണ്‍സില്‍ വ്യക്തമാക്കി. ട്രംപിന്റെ നീക്കം മേഖലയിലെ സമാധാന ശ്രമങ്ങള്‍ക്ക് ഒരു തരത്തിലും സഹായകരമാകില്ലെന്ന് സുരക്ഷാ കൗണ്‍സിലിന്റെ അടിയന്തിര യോഗത്തിന് ഒടുവില്‍ അഞ്ച് രാജ്യങ്ങളും വ്യക്തമാക്കി. ഇതിനിടെ, ട്രംപിന്റെ തീരുമാനത്തിനു പിന്നാലെ ഗാസയിലും വെസ്റ്റ് ബാങ്കിലും സംഘര്‍ഷം പുകയുകയാണ്.