‘പ്രിയപ്പെട്ട, ബഹുമാനപ്പെട്ട കായികതാരങ്ങളെ’ – നാവുളുക്കിയ മന്ത്രി മണി കലോത്സവത്തെ കായികമേളയാക്കി !

രണ്ടാംവര്‍ഷവും റവന്യു ജില്ലാ കലോത്സവത്തില്‍ മന്ത്രി എം.എം. മണിക്കു നാവുപിഴ. കഴിഞ്ഞവര്‍ഷത്തെപ്പൊലെ ഇത്തവണവും കലോത്സവത്തെ കായികമേളയാക്കുകയായിരുന്നു മന്ത്രി. കലോത്സവത്തിന്റെ രണ്ടാംദിനം പ്രധാനവേദിയിലെത്തിയ മന്ത്രി പ്രിയപ്പെട്ട, ബഹുമാനപ്പെട്ട കായികതാരങ്ങളെ എന്നു അഭിസംബോധന ചെയ്‌താണു പ്രസംഗിച്ചു തുടങ്ങിയത്‌. ഇന്നലെ വൈകിട്ട്‌ ഏഴോടെയാണു മന്ത്രി കല്ലാര്‍ ജി.എച്ച്‌.എസ്‌.എസിലെ പ്രധാന വേദിയിലെത്തിയത്‌.

കായികതാരങ്ങളേ എന്ന്‌ അഭിസംബോധന ചെയ്‌തു തുടങ്ങിയ മന്ത്രി പിന്നീട്‌ മത്സരങ്ങളിലെ വിജയികളെയും പരാജയപ്പെട്ടവരെയും കുറിച്ചാണു പറഞ്ഞത്‌. തോറ്റുപോയവര്‍ വീണ്ടും വാശിയോടെ അടുത്ത മത്സരത്തിനെത്തണമെന്നും, ഉദ്‌ഘാടനത്തിന്‌ എത്താത്തതിനു അദ്ദേഹം ഖേദവും പ്രകടിപ്പിച്ചു. ഒടുവില്‍ വിജയികള്‍ക്കു ട്രോഫിയും മെഡലും സമ്മാനിക്കുകയും തിരുവാതിര കളിയിലെ വിജയികള്‍ക്കൊപ്പം സെല്‍ഫിയുമെടുത്താണു മന്ത്രി വേദിവിട്ടത്‌.