മൃതദേഹത്തിനു വേണ്ടി സി.പി.എമ്മിന്റെയും ബി.ജെ.പിയുടേയും അവകാശത്തര്‍ക്കം !

കൈപ്പമംഗലത്ത് ശനിയാഴ്ച സി.പി.എം-ബി.ജെ.പി. സംഘട്ടനത്തിനിടെ പരുക്കേറ്റ കാളമുറി ചക്കംപാത്ത് സതീശനാണ് മരണത്തിനു ശേഷം തര്‍ക്കവിഷയമായത്. ബി.ജെ.പി. പ്രവര്‍ത്തകരും സി.പി.എം. പ്രവര്‍ത്തകരും തമ്മില്‍ നടന്ന സംഘട്ടനത്തില്‍ പരുക്കേറ്റ് കാളമുറി പടിഞ്ഞാറുവശം താമസിക്കുന്ന ചക്കംപാത്ത് കുഞ്ഞയ്യപ്പന്റെ മകന്‍ സതീശന്‍ (45) ആണു മരിച്ചത്. ബന്ധുവിനെ മര്‍ദിക്കുന്നതു തടയാന്‍ ശ്രമിക്കുന്നതിനിടെയാണു സതീശനു മര്‍ദനമേറ്റത്.ഇന്നലെ രാവിലെ എട്ടു മണിക്കു തൃശൂരിലെ സ്വകാര്യാശുപത്രിയിലായിരുന്നു അന്ത്യം.

മരണവിവരമറിഞ്ഞതോടെ വീടിനോടു ചേര്‍ന്നുള്ള ജങ്ഷനിലെ കൊടിമരത്തില്‍ സി.പി.എമ്മുകാര്‍ കൊടി പകുതി താഴ്ത്തിക്കെട്ടി. കരിങ്കൊടി ഉയര്‍ന്നു. ''സതീശന്‍ അന്തരിച്ചു. ആദരാഞ്ജലികള്‍. സി.പി.എം'' എന്നു ബോര്‍ഡും വച്ചു. ബി.ജെ.പി. പ്രവര്‍ത്തകരും സതീശന്റെ വസതിയിലെത്തി. തങ്ങളുടെ പ്രവര്‍ത്തകനാണു സതീശന്‍ എന്ന അവകാശവാദം തര്‍ക്കമായതോടെ അണികള്‍ സംഘര്‍ഷത്തിന്റെ വക്കോളമെത്തി.''കൊന്നിട്ട് റീത്ത് വയ്ക്കാന്‍ വന്നിരിക്കുന്നു'' എന്നു ബി.ജെ.പി. പ്രവര്‍ത്തകര്‍. കഴിഞ്ഞയാഴ്ച കോടിയേരി ബാലകൃഷ്ണന്‍ കാളമുറിയില്‍ പങ്കെടുത്ത പരിപാടിയില്‍ സതീശന്‍ പങ്കെടുത്തിരുന്നു എന്ന് സി.പി.എമ്മുകാരുടെ എതിര്‍വാദം. നൂറിലേറെ പോലീസുകാര്‍ സ്ഥലത്തെത്തി രണ്ടു കൂട്ടരെയും ഒഴിപ്പിച്ചു.