സാമ്പത്തിക പ്രതിസന്ധിയില്‍ ധവളപത്രമിറക്കണമെന്ന് ചെന്നിത്തല

ഗുരുതരമായ സാമ്പത്തിക പ്രതിസന്ധിയാണ് സംസ്ഥാനം നേരിടുന്നതെന്ന്‌ പ്രതിപക്ഷ നേതാവ് രമേശ് ചെന്നിത്തല. ജി.എസ്.ടി വരുന്നതോടെ സംസ്ഥാനത്തിന്റെ സാമ്പത്തിക പ്രതിസന്ധി മാറുമെന്ന് പറഞ്ഞ ധനമന്ത്രി തോമസ് ഐസക്ക് ഇതിന് മറുപടി പറയണം. സാമ്പത്തിക പ്രതിസന്ധിയുടെ കാരണം വ്യക്തമാക്കി സര്‍ക്കാര്‍ ധവളപത്രമിറക്കണം. സംസ്ഥാനത്തെ മാധ്യമപ്രവര്‍ത്തകര്‍ കടുത്ത വെല്ലുവിളിയാണ് നേരിടുന്നത്. ജനങ്ങള്‍ക്കു വേണ്ടി മാധ്യമപ്രവര്‍ത്തകര്‍ ചോദ്യം ചോദിക്കുമ്പോള്‍ അവരെ അകറ്റിനിര്‍ത്തുന്നത് ജനാധിപത്യ വിരുദ്ധമാണെന്നും ചെന്നിത്തല കുറ്റപ്പെടുത്തി. സെക്രട്ടേറിയറ്റ് വളപ്പില്‍ പോലും മാധ്യമപ്രവര്‍ത്തകര്‍ക്ക് പ്രവേശനം അനുവദിക്കാത്തത് കേരള ചരിത്രത്തില്‍ ഇതുവരെ ഉണ്ടാകാത്ത സംഭവമാണെന്നും ചെന്നിത്തല പറഞ്ഞു. യു.ഡി.എഫിന്റെ പടയൊരുക്കം പ്രചാരണജാഥയുമായി ബന്ധപ്പെട്ട് തൊടുപുഴയില്‍ പത്രസമ്മേളനത്തില്‍ സംസാരിക്കുകയായിരുന്നു അദ്ദേഹം.