വരള്‍ച്ച : കോഴിക്കോട്‌ 77 ചെക്ക്‌ ഡാമുകള്‍ പണിയും

പുഴകളിലെയും മറ്റു ജലാശയങ്ങളിലെയും വെള്ളം നഷ്‌ടപ്പെടാതെ സംരക്ഷിക്കുന്നതിനുള്ള പദ്ധതിക്കു ജലസേചനവകുപ്പ്‌ രൂപം നല്‍കി. 'ജലവര്‍ഷിനി' എന്ന പേരിലുള്ള ജലസംരക്ഷണ പദ്ധതിയില്‍ കോഴിക്കോട്‌ ജില്ലയിലെ വിവിധ നദികളിലായി 477 ചെക്ക്‌ ഡാമുകള്‍ നിര്‍മിക്കും. ഡാമുകള്‍ പണിയുന്നതിനുള്ള സ്‌ഥലങ്ങള്‍ ജലസേചന വകുപ്പ്‌ കണ്ടെത്തിയിട്ടുണ്ട്‌. കഴിഞ്ഞ വേനലിലെ കൊടിയ വരള്‍ച്ച കണക്കിലെടുത്താണ്‌ നദീ സംരക്ഷണ പ്രവര്‍ത്തനത്തിനു ജലസേചന വകുപ്പ്‌ മുന്നിട്ടിറങ്ങുന്നത്‌. ഈ വര്‍ഷം ഭേദപ്പെട്ട മഴ കിട്ടിയിട്ടുണ്ടെങ്കിലും കുടിവെള്ളത്തിനു ക്ഷാമം ഉണ്ടാകുമെന്നുതന്നെയാണ്‌ വിലയിരുത്തല്‍.അതു മുന്‍കൂട്ടി കണ്ടാണ്‌ ജലസേചന വകുപ്പ്‌ പദ്ധതിയുമായി രംഗത്തുവന്നിട്ടുള്ളത്‌. ഇതാദ്യമായാണ്‌ വേനല്‍കാലത്തിനുമുമ്പു ഗൗരവമേറിയ ഇത്തരമൊരു നടപടി വരുന്നത്‌.

വെള്ളം സംരക്ഷിച്ചു നിര്‍ത്തുന്നതിനു പുഴകളില്‍ താല്‍ക്കാലിക ചെക്ക്‌ ഡാമുകളുടെ നിര്‍മാണമാണ്‌ പരിഗണനയില്‍ ഉള്ളത്‌. ഇതിനായി വിവിധ നദികളിലും ജലാശയങ്ങളിലുമായി 477 കേന്ദ്രങ്ങള്‍ ജലസേചന വകുപ്പ്‌ കണ്ടെത്തിയിട്ടുണ്ട്‌. വെള്ളം കെട്ടി നിര്‍ത്തി ഭൂഗര്‍ഭ ജലത്തിന്റെ അളവു വര്‍ധിപ്പിക്കുകയാണ്‌ ലക്ഷ്യം.