ജയരാജന്‍ വധശ്രമം : തന്നെ മന്ത്രി മന്ദിരത്തില്‍ ഒളിപ്പിച്ചത് എംവിആറെന്ന് കെ. സുധാകരന്‍

മുന്‍ മന്ത്രി ഇ.പി ജയരാജനെ വധിക്കാന്‍ ശ്രമിച്ച കേസില്‍ തന്നെ മന്ത്രി മന്ദിരത്തില്‍ ഒളിപ്പിച്ചത് എംവിആറെന്ന് കെ. സുധാകരന്‍. ആന്ധ്ര പോലീസ് തന്നെ അറസ്റ്റ് ചെയ്യുന്നതിന് എത്തിയപ്പോള്‍ മന്ത്രി മന്ദിരത്തില്‍ ഒളിപ്പിച്ചത് എം.വി രാഘവനാണെന്ന് കെ. സുധാകരന്റെ വെളിപ്പെടുത്തല്‍. എം.വി രാഘവന്റെ മൂന്നാം ചരമവാര്‍ഷികത്തോട് അനുബന്ധിച്ച് സംഘടിപ്പിച്ച അനുസ്മരണ സമ്മേളനത്തിലാണ് സുധാകരന്റെ വെളിപ്പെടുത്തല്‍. 1995ലാണ് ഇ.പി ജയരാജനെ ട്രെയിന്‍ യാത്രയ്ക്കിടെ വധിക്കാന്‍ ശ്രമിച്ചത്.

95ല്‍ സി.പി.എം പാര്‍ട്ടി കോണ്‍ഗ്രസ് കഴിഞ്ഞ് ഹൈദരാബാദല്‍ നിന്ന് കേരളത്തിലേക്ക് മടങ്ങുകയായിരുന്ന ജയരാജന് വെടിയേല്‍ക്കുകയായിരുന്നു. ആന്ധ്രയിലെ ഓംഗോളില്‍ വച്ചാണ് ആക്രമണമുണ്ടായത്. ജയരാജന് മുന്നിലെത്തിയ അക്രമി വെടിവയ്ക്കുകയായിരുന്നു. കെ. സുധാകരനും എംവി രാഘവനും ചേര്‍ന്ന് അയച്ച ഗുണ്ടകളാണ് ജയരാജനെ വധിക്കാന്‍ ശ്രമിച്ചതെന്നായിരുന്നു ആരോപണം. സംഭവുമായി ബന്ധപ്പെട്ട് ദിനേശ്, ശശി എന്നീ വാടകക്കൊലയാളികള്‍ പിന്നീട് പിടിയിലായി.

ഈ കേസില്‍ തന്നെ അറസ്റ്റ് ചെയ്യുന്നതിന് ആന്ധ്ര പോലീസ് എത്തിയപ്പോള്‍ എം.വി.ആര്‍ മന്ത്രിമന്ദിരത്തില്‍ ഒളിപ്പിച്ചുവെന്നാണ് സുധാകരന്റെ വെളിപ്പെടുത്തല്‍. താന്‍ പാര്‍ട്ടി ഓഫീസിനടുത്ത് നില്‍ക്കുംമ്പാള്‍ എംവിആറിന്റെ കാറ് വന്നു ഉടന്‍ കാറില്‍ കയറ്റി. എംവിആറിന്റെ ഔദ്യോഗിക വസതിയിലേക്ക് കൊണ്ടുപോയി. രണ്ട് ദിവസം അവിടെ ഒളിവില്‍ കഴിഞ്ഞു.

ജയരാജന്‍ വധക്കേസില്‍ പ്രതികളിലൊരാളെ 2011ല്‍ 19 വര്‍ഷം തടവുശിക്ഷയ്ക്ക് ആന്ധ്ര കോടതി ശിക്ഷിച്ചു. പ്രതികളില്‍ രണ്ടാമന്‍ വിചാരണാ വേളയില്‍ മരിച്ചു. സുധാകരനേയും രാഘവനേയും ഓംഗോള്‍ കോടതി കുറ്റവിമുക്തരാക്കുകയായിരുന്നു.