ഭൂമി കയ്യേറ്റം: മന്ത്രിക്ക് പ്രത്യേക പരിഗണനയുണ്ടോയെന്ന് ഹൈക്കോടതി ?

ഭൂമി കയ്യേറ്റത്തില്‍ മന്ത്രിക്ക് പ്രത്യേക പരിഗണനയുണ്ടോയെന്ന് ഹൈക്കോടതി. മന്ത്രി തോമസ് ചാണ്ടിക്കെതിരായ ഭൂമി കയ്യേറ്റ വിഷയത്തില്‍ പൊതുതാല്‍പര്യ ഹര്‍ജി പരിഗണിക്കുമ്പോഴാണ് കോടതി ആശങ്ക പ്രകടിപ്പിച്ചത്. പാവപ്പെട്ടവനാണ് ഭൂമി കയ്യേറുന്നതെങ്കില്‍ ഈ നിലപാട് ആയിരിക്കുമോ എന്നും കോടതി വിമര്‍ശിച്ചു. സര്‍ക്കാരിന്റെയും റവന്യൂവകുപ്പിന്റെയും വിശദീകരണത്തിനായി ഹര്‍ജി മാറ്റി.

ഭൂമി കയ്യേറിയത് പാവപ്പെട്ടവനാണെങ്കില്‍ ബുള്‍ഡോസര്‍ ഉപയോഗിച്ച് കയ്യേറ്റം ഒഴിപ്പിക്കില്ലേ. തോമസ് ചാണ്ടിക്കെതിരെ അന്വേഷണം തുടങ്ങിയോ എന്ന് കോടതി സര്‍ക്കാര്‍ അഭിഭാഷകനോട് ചോദിച്ചു. അന്വേഷണം ആരംഭിച്ചതായി മറുപടി നല്‍കി. അന്വേഷണം പൂര്‍ത്തിയായോ എന്ന ചോദ്യത്തിന് ഇല്ലെന്നായിരുന്നു മറുപടി. എന്തുകൊണ്ട് കലക്ടറുടെ റിപ്പോര്‍ട്ടിന് പ്രാധാന്യം നല്‍കുന്നില്ലെന്നും കോടതി വിമര്‍ശിച്ചു.

എല്ലാവര്‍ക്കും തുല്യ നീതി വേണമെന്ന് ആവര്‍ത്തിച്ച് ഓര്‍മ്മിപ്പിച്ച കോടതി തോമസ് ചാണ്ടിയുടെ ഭൂമി കയ്യേറ്റം സംബന്ധിച്ച് മുന്‍പ് സമര്‍പ്പിച്ച രണ്ട് ഹര്‍ജികളും ഈ കേസും സമാന സ്വഭാവമുള്ളതിനാല്‍ ചീഫ് ജസ്റ്റീസിന്റെ അനുമതിയോടെ ഒരുമിച്ച് പരിഗണിക്കുമെന്നും വ്യക്തമാക്കി. കലക്ടറുടെ റിപ്പോര്‍ട്ടോടെ തോമസ് ചാണ്ടിയുടെ നില പരുങ്ങലില്‍ ആയിരുന്നു. ചാണ്ടിയുടെ അവസാന പ്രതീക്ഷയും തകര്‍ക്കുന്നതായിരുന്നു കോടതിയില്‍ നിന്നുമുണ്ടായ വിമര്‍ശനം.