ലേക് പാലസ് റോഡ് നിര്‍മ്മാണം : തോമസ് ചാണ്ടിക്കെതിരെ ത്വരിത പരിശോധന

ലേക് പാലസ് റിസോര്‍ട്ടിലേക്ക് റോഡ് നിര്‍മ്മാണത്തിലെ അപാകത ചൂണ്ടിക്കാട്ടി തോമസ് ചാണ്ടിക്കൊതിരെ ത്വരിത പരിശോധനയ്ക്ക് കോട്ടയം വിജിലന്‍സ് കോടതിയുടെ ഉത്തരവ്. ആലപ്പുഴ സ്വദേശി അഭിഭാഷകനായ സുഭാഷ് നല്‍കിയ പരാതിയിലാണ് കോടതി നിര്‍ദേശം. രണ്ടര ഏക്കറോളം നിലം അനധികൃതമായി നികത്തി ഒരു കിലോമീറ്ററോളം റോഡ് നിര്‍മ്മിച്ചുവെന്നും 65 ലക്ഷം രൂപയുടെ എം.പി, എം.എല്‍.എ ഫണ്ടുകള്‍ ഇതിനായി ദുരുപയോഗിച്ചുവെന്നും പരാതിക്കാരന്‍ ചൂണ്ടിക്കാട്ടി.

ത്വരിത പരിശോധന നടത്തുന്നതിനെ വിജിലന്‍സ് അഭിഭാഷകന്‍ എതിര്‍ത്തിരുന്നു. ഈ റോഡ് ഇരുന്ന സ്ഥലത്ത് നേരത്തെ ഒരു ബണ്ട് റോഡ് ഉണ്ടായിരുന്നുവെന്നും അത് വിപുലപ്പെടുത്തുക മാത്രമാണ് ചെയ്തതെന്നും വിജിലന്‍സ് ചൂണ്ടിക്കാട്ടി. ഇത് വകവയ്ക്കാതെയാണ് കോടതി അന്വേഷണത്തിന് ഉത്തരവിട്ടത്.