ആശയക്കുഴപ്പം പരിഹരിച്ച് ആര്‍ബിഐ;ബാങ്ക് അക്കൗണ്ടുകള്‍ ആധാറുമായി ബന്ധിപ്പിക്കണം

ന്യൂഡല്‍ഹി:ബാങ്ക് അക്കൗണ്ടുകള്‍ ആധാറുമായി ബന്ധിപ്പിക്കണമെന്ന നിബന്ധന ആര്‍ബിഐ പുറത്തിറക്കി.മൂന്നു ദിവസം മുന്‍പ് ,ബാങ്ക് അക്കൗണ്ടുകള്‍ ആധാറുമായി ബന്ധിപ്പിക്കുന്നത് നിര്‍ബന്ധമല്ലെന്ന് റിസര്‍വ്വ് ബാങ്ക് ഓഫ് ഇന്‍ഡ്യ പ്രഖ്യാപിച്ചിരുന്നു.അത് വിവാദമായതിനെ തുടര്‍ന്ന് ആധാര്‍ ബന്ധിപ്പിക്കല്‍ നിര്‍ബ്ബന്ധമാണെന്ന് ആര്‍ബിഐ വ്യക്തമാക്കിയിരുന്നു.വിവരാവകാശ നിയമപ്രകാരമുള്ള ചോദ്യത്തിന് ആര്‍ബിഐ നല്‍കിയ മറുപടിയിലാണ് ബാങ്ക് അക്കൗണ്ടുകള്‍ ആധാര്‍ ബന്ധിപ്പിക്കല്‍ നിര്‍ബന്ധമല്ലെന്ന് പറഞ്ഞിരുന്നത്‌

പ്രിവെന്‍ഷന്‍ ഓഫ് മണി ലോണ്ടറിംഗ് നിയമങ്ങള്‍ പ്രകാരമാണ് സര്‍ക്കാര്‍ ഉത്തരവെന്നും ബാങ്ക് അക്കൗണ്ടുകള്‍ ആധാറുമായി ബന്ധിപ്പിക്കേണ്ടത് നിര്‍ബന്ധമാണെന്നും ആര്‍ബിഐ പ്രസ്താവനയില്‍ അറിയിച്ചു. സര്‍ക്കാര്‍ ഉത്തരവിന്റെ അടിസ്ഥാനത്തില്‍ ബാങ്ക് അക്കൗണ്ടുകള്‍ ആധാറുമായി ബന്ധിപ്പിച്ച് തുടങ്ങണമെന്നും അതിന് മറ്റൊരു ഉത്തരവിന്റെ ആവശ്യമില്ലെന്നും ആര്‍ബിഐ വ്യക്തമാക്കി. ഡിസംബര്‍ 31 ആണ് സര്‍ക്കാര്‍ നിശ്ചയിച്ചിരിക്കുന്ന അവസാന തിയതിയെന്നും അതില്‍ മാറ്റമില്ലെന്നും ആര്‍ബിഐ അറിയിച്ചു.

സ്വകാര്യത എന്നത് സമ്പൂര്‍ണമല്ലെന്നും ആധാര്‍ നിയമവിരുദ്ധമല്ലെന്നും സുപ്രീംകോടതി നേരത്തെ വിധിപ്രസ്താവനയില്‍ പറയുകയും ചെയ്തിരുന്നു.