സഞ്ചാരികളെ ആകര്‍ഷിക്കാനൊരുങ്ങി ശ്രീനാരായണപുരം

സഞ്ചാരികളെ ആകര്‍ഷിക്കാനൊരുങ്ങി ശ്രീനാരായണപുരം വിനോദസഞ്ചാര കേന്ദ്രം. ഹൈറേഞ്ചിലേക്കു പ്രതിദിനം എത്തുന്ന ആയിരക്കണക്കിനു സഞ്ചാരികളുടെ ഇഷ്‌ടകേന്ദ്രമായി ഇടുക്കി രാജാക്കാട്‌ പഞ്ചായത്തിലെ ശ്രീനാരായണപുരം വിനോദസഞ്ചാര കേന്ദ്രം മാറിക്കഴിഞ്ഞു. സഞ്ചാരികളെ ആകര്‍ഷിക്കാനായി ഡി.ടി.പി.സി ഒന്നരക്കോടി രൂപയുടെ പദ്ധതികളാണ്‌ നടപ്പാക്കുന്നത്‌.

വെള്ളച്ചാട്ടങ്ങള്‍ അടുത്തു നിന്നു കാണുന്നതിനായി പവലിയനുകളും മറ്റ്‌ അടിസ്‌ഥാന സൗകര്യങ്ങളും ഒരുക്കുന്നതിനുള്ള തയാറെടുപ്പുകള്‍ വകുപ്പ്‌ ആരംഭിച്ചുകഴിഞ്ഞു. പതഞ്ഞൊഴുകിയെത്തുന്ന മുതിരപ്പുഴയാറില്‍ തേക്കിന്‍കാനം മുതല്‍ ശ്രീനാരായണപുരം വരെയുള്ള ഒന്നര കിലോമീറ്റര്‍ ദൂരത്തില്‍ ദൃശ്യവിരുന്നൊരുക്കുന്ന അഞ്ച്‌ വെള്ളച്ചാട്ടങ്ങളാണ്‌ ഇവിടുത്തെ പ്രധാന ആകര്‍ഷണം. റിപ്പിള്‍ വാട്ടര്‍ ഫോള്‍സ്‌ എന്ന പേരിലാണ്‌ ഇവിടം അറിയപ്പെടുന്നത്‌. ദിവസേന നൂറുകണക്കിന്‌ സഞ്ചാരികളാണ്‌ ഇവിടം സന്ദര്‍ശിക്കാന്‍ എത്തുന്നത്‌. സഞ്ചാരികളുടെ എണ്ണത്തില്‍ വര്‍ധനയുണ്ടായതോടെയാണ്‌ അടിസ്‌ഥാന സൗകര്യങ്ങള്‍ വര്‍ധിപ്പിക്കുന്നതിനുള്ള പദ്ധതികളുമായി ഡി.ടി.പി.സി രംഗത്തെത്തിയത്‌.