തട്ടിക്കൊണ്ടുപോയ മലയാളി വിദ്യാര്‍ഥി ബംഗളുരുവില്‍ കൊല്ലപ്പെട്ട നിലയില്‍

തട്ടിക്കൊണ്ടുപോയ മലയാളി വിദ്യാര്‍ഥി ബംഗളുരുവില്‍ കൊല്ലപ്പെട്ട നിലയില്‍ കണ്ടെത്തി. കഴിഞ്ഞയാഴ്‌ച കാണാതായ ആചാര്യ ഇന്‍സ്‌റ്റിറ്റ്യൂട്ട്‌ ഓഫ്‌ എന്‍ജിനിയറിങ്ങിലെ വിദ്യാര്‍ഥി ശരത്താണു (19) കൊല്ലപ്പെട്ടത്‌. ആദായനികുതി ഉദ്യോഗസ്‌ഥനായ നിരഞ്‌ജന്‍ കുമാറിന്റെ മകനാണ്‌. ബംഗളുരു നഗരത്തോടു ചേര്‍ന്നുള്ള രാമോഹള്ളി തടാകത്തിനടുത്തു നിന്ന്‌ ഇന്നലെ രാവിലെ മൃതദേഹം കണ്ടെടുക്കുകയായിരുന്നു. ശരത്തിന്റെ സുഹൃത്തും അകന്ന ബന്ധുവുമായ വിശാല്‍ അടക്കം ആറുപേരെ പോലീസ്‌ കസ്‌റ്റഡിയിലെടുത്തു.

ശരത്തിന്റെ സഹോദരിയുടെ സഹപാഠിയാണു വിശാല്‍. പണത്തിനു വേണ്ടി ശരത്തിനെ തട്ടിക്കൊണ്ടുപോയതാണെന്നും മാതാപിതാക്കള്‍ പരാതിപ്പെട്ടതോടെ കൊലപ്പെടുത്തുകയായിരുന്നെന്നും പോലീസ്‌ പറഞ്ഞു. കഴിഞ്ഞ 12 നാണു ശരത്തിനെ കാണാതായത്‌. പുതിയ ബൈക്ക്‌ സുഹൃത്തുക്കളെ കാണിക്കാന്‍ വീട്ടില്‍നിന്നുപോയ ശരത്ത്‌ തിരിച്ചെത്തിയില്ല. തന്നെ തട്ടിക്കൊണ്ടുപോയിരിക്കുകയാണെന്നും മോചനത്തിനായി 50 ലക്ഷം രൂപ നല്‍കണമെന്നും ശരത്‌ പറയുന്ന വീഡിയോ സന്ദേശം 15 നു വാട്ട്‌സ്‌ആപ്പ്‌ വഴി മാതാപിതാക്കള്‍ക്കു ലഭിച്ചിരുന്നു.