ബീഫിനെക്കുറിച്ച് പറഞ്ഞത് തമാശ ; കേരളത്തില്‍ തമാശ ആസ്വദിക്കാന്‍ ആളില്ലെന്ന് കണ്ണന്താനം !

രാജ്യത്തെക്കുറിച്ച് പ്രധാനമന്ത്രിക്കുള്ള സ്വപ്നം കേരളത്തിലെ ജനങ്ങളും പങ്കിടണമെന്ന് കേന്ദ്ര മന്ത്രി അല്‍ഫോണ്‍സ് കണ്ണന്താനം. കേരളത്തില്‍ ബിജെപിയുടെ വോട്ട് ശതമാനം കൂടുന്നത് പാര്‍ട്ടിയുടെ വളര്‍ച്ചയുടെ ലക്ഷണമാണെന്നും കണ്ണന്താനം പറഞ്ഞു. എറണാകുളം പ്രസ് ക്ലബ്ബില്‍ നടത്തിയ വാര്‍ത്താ സമ്മേളനത്തില്‍ സംസാരിക്കുകയായിരുന്നു കണ്ണന്താനം.

അതേസമയം ബീഫിനെക്കുറിച്ച് ഒഡീഷയില്‍ വച്ച് താന്‍ പറഞ്ഞത് തമാശയാണെന്ന് കണ്ണന്താനം പറഞ്ഞു. അത് തമാശയായി എടുക്കാതിരുന്നതാണ് വിവാദമാകാന്‍ കാരണം. വിദേശരാജ്യങ്ങളില്‍ നല്ല ബീഫ് കിട്ടും. അവര്‍ക്ക് ഇവിടെ വന്ന് മെലിഞ്ഞ കാലികളുടെ മാംസം കഴിക്കേണ്ടതുണ്ടോ എന്നാണ് തമാശയായി ചോദിച്ചതെന്നും മന്ത്രി പറഞ്ഞു. കേരളത്തില്‍ തമാശ ആസ്വദിക്കാന്‍ ആളില്ല.

രാഷ്ട്രീയക്കാര്‍ക്ക് തമാശ പറയാന്‍ അറിയില്ലെന്ന് കരുതരുത്. ഞാനൊരു ഫണ്‍ പേഴ്‌സനാണ്. ജീവിതം സന്തോഷിക്കാനുള്ളതാണ്. എന്റെ ഭാര്യയുടെ വീഡിയോയും പ്രചരിക്കുന്നുണ്ട്. അതൊക്കെ കണ്ട് ഞങ്ങള്‍ ചിരിക്കുകയാണ്. കേരളത്തിലെ ആളുകള്‍ക്ക് മറ്റ് പണിയൊന്നുമില്ല. രാവിലെ മുതല്‍ വൈകുന്നേരം വരെ മൊബൈലില്‍ കയറി കാര്‍ട്ടൂണ്‍ ഉണ്ടാക്കുകയാണ്.