ഫാ.ടോം ഉഴുന്നാലിനെ മോചിപ്പിക്കാന്‍ തീവ്രവാദികള്‍ക്ക് മോചനദ്രവ്യം നല്‍കിയില്ലെന്ന് കേന്ദ്രസര്‍ക്കാര്‍

യെമനില്‍ തീവ്രവാദികള്‍ ബന്ധിയാക്കിയിരുന്ന ഫാ.ടോം ഉഴുന്നാലിനെ മോചിപ്പിക്കാന്‍ തീവ്രവാദികള്‍ക്ക് മോചനദ്രവ്യം നല്‍കിയില്ലെന്ന് കേന്ദ്രസര്‍ക്കാര്‍. വിദേശകാര്യ സഹമന്ത്രി വി.കെ സിംഗ് ആണ് ഇക്കാര്യം വ്യക്തമാക്കിയത്. ഫാ.ടോമിന്റെ മോചനത്തിന് സ്വീകരിച്ച തന്ത്രങ്ങളെ കുറിച്ചുള്ള മാധ്യമങ്ങളുടെ ചോദ്യത്തിന് അതേകുറിച്ച് ഇപ്പോള്‍ പ്രതികരിക്കാന്‍ കഴിയില്ലെന്നും വി.കെ സിംഗ് അറിയിച്ചു. തിരുവനന്തപുരത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം.

ഉഴുന്നാലിന്റെ മോചനത്തിന് 64 കോടി രൂപ മോചനദ്രവ്യമായി നല്‍കിയിരുന്നുവെന്ന് റിപ്പോര്‍ട്ടുണ്ടായിരുന്നു. ഒമാന്‍ സര്‍ക്കാരാണോ വത്തിക്കാനാണോ പണം നല്‍കിയതെന്ന കാര്യത്തില്‍ ചോദ്യങ്ങള്‍ ഉയരുന്നതിനിടെയാണ് പണം നല്‍കിയില്ലെന്ന് വിശദീകരണവുമായി കേന്ദ്രസര്‍ക്കാര്‍ രംഗത്തെത്തിയത്.

അതേസമയം, മോചനദ്രവ്യം നല്‍കിയിരുന്നോ എന്ന് പറയാനാവില്ലെന്ന് കേന്ദ്ര ടൂറിസം മന്ത്രി അല്‍ഫോന്‍സ് കണ്ണന്താനം പറഞ്ഞു. കേന്ദ്രസര്‍ക്കാര്‍ ഇടപെട്ടില്ലായിരുന്നുവെങ്കില്‍ മോചനം സാധ്യമാകില്ലായിരുന്നുവെന്ന് കണ്ണന്താനം കോട്ടയത്ത് പറഞ്ഞു. 19 മാസം ഐ.എസ് ഭീകരരുടെ തടവിലായിരുന്ന ഫാ. ടോമിനെ ഒമാന്‍ സുല്‍ത്താന്റെ ഇടപെടലിനെ തുടര്‍ന്ന് ഇന്നലെയാണ് മോചിപ്പിച്ച് . തുടര്‍ന്ന് അദ്ദേഹത്തെ വത്തിക്കാനില്‍ എത്തിക്കുകയായിരുന്നു.