മുംബൈ സ്‌ഫോടനം: ഫിറോസ് ഖാനും താഹിറിനും വധശിക്ഷ

മുംബൈ സ്‌ഫോടനക്കേസിലെ മുഖ്യപ്രതികളായ ഫിറോസ് ഖാനും താഹിര്‍ മെര്‍ച്ചന്റിനും വധശിക്ഷ. കൂട്ടുപ്രതികളായ അബു സലേമിനും കരിമുള്ള ഖാനും മുംബൈ പ്രത്യേക ടാഡ കോടതി ജീവപര്യന്തം തടവുശിക്ഷയും വിധിച്ചു. ഇരുവര്‍ക്കും കോടതി രണ്ടു ലക്ഷം രൂപ വീതം പിഴയും ചുമത്തി. കേസിലെ മറ്റൊരു പ്രതി റിയാസ് സിദ്ദിഖിയ്ക്ക് 10 വര്‍ഷം തടവും 10,000 രൂപ പിഴയും ചുമത്തി. മുംബൈ സ്‌ഫോടനക്കേസിലെ രണ്ടും ഘട്ട വിചാരണയില്‍ അഞ്ചു പ്രതികള്‍ക്കെതിരായ ശിക്ഷയാണ് കോടതി ഇന്ന് വിധിച്ചത്.

1993 മാര്‍ച്ച് 12നാണ് മുംബൈ സ്‌ഫോടന പരമ്പര അരങ്ങേറിയത്. 257 പേരാണ് സ്‌ഫോടനങ്ങളില്‍ കൊല്ലപ്പെട്ടത്. കൊലപാതകം, ക്രിമിനല്‍ ഗൂഢാലോചന, സ്‌ഫോടനം നടത്തല്‍, തീവ്രവാദ പ്രവര്‍ത്തനം തുടങ്ങിയ കുറ്റങ്ങള്‍ ഇവര്‍ക്കെതിരെ ചുമത്തിയിരുന്നു. കേസിലെ ഏഴാം പ്രതി അബ്ദുള്‍ ഖ്വയമിനെ കുറ്റക്കാരനല്ലെന്ന് കണ്ട് കോടതി നേരത്തെ വെറുതെ വിട്ടിരുന്നു. മറ്റൊരു പ്രതിയായ മുസ്തഫ ദൂസ്സ വിചാരണയ്ക്കിടെ മരണമടഞ്ഞതിനാല്‍ കേസില്‍ നിന്ന് ഒഴിവാക്കിയിരുന്നു. ദാവൂദ് ഇബ്രാഹിം അടക്കം ഏതാനും ചില പ്രതികള്‍ ഇപ്പോഴും ഒളിവിലാണ്.