ഒമ്പതുവയസ്സുകാരന്‍ 18 കാരിയെ പ്രണയിക്കുന്ന പരമ്പര തുടരും !

ഒമ്പതുവയസ്സുകാരന്‍ 18 കാരിയെ പ്രണയിക്കുന്ന പരമ്പര തുടരും. ഏറ വിവാദങ്ങള്‍ക്ക് വഴിവെച്ച ടെലിവിഷന്‍ പരമ്പരയായ 'പെഹ്‌റേദാര്‍ പിയാ കി' യ്ക്ക് ഒടുവില്‍ പുനര്‍ജീവനം. കഴിഞ്ഞ മാസം ബാല വിവാഹം പ്രോത്സിഹിപ്പിക്കുന്നു എന്ന ആരോപണത്തില്‍ കുടുങ്ങി നിരോധിക്കപ്പെട്ട പരമ്പര ഒക്‌ടോബര്‍ മുതല്‍ സമയം മാറ്റി പ്രേക്ഷകര്‍ക്ക് മുന്നില്‍ എത്തിക്കാനാണ് നീക്കം.

ഇക്കാര്യത്തില്‍ പ്രേക്ഷേപണ മന്ത്രാലയം പരമ്പരയുടെ ഉടമസ്ഥരായ സോണി എന്റര്‍ടെയ്ന്‍മെന്റ് ടെലിവിഷന് പുതിയ മാര്‍ഗ്ഗനിര്‍ദേശം നല്‍കിയതായും ഇതില്‍ രാത്രി 8.30ന് സംപ്രേഷണം ചെയ്തിരുന്ന പരമ്പര രണ്ടു മണിക്കൂര്‍ കഴിഞ്ഞ് 10.30 ലേക്ക് മാറ്റിപ്പിടിക്കാന്‍ ആവശ്യപ്പെടുകയും ചെയ്തതായിട്ടാണ് വിവരം. ബ്രോഡ് കാസ്റ്റിംഗ് കണ്ടെന്റ് കംപ്‌ളെയിന്റ്‌മെന്റ് കൗണ്‍സിലിന്റെ നിര്‍ദേശത്തെ തുടര്‍ന്ന് ഓര്‍ഡര്‍ കിട്ടിയതായി വ്യക്തമാക്കി ചാനല്‍ ഔദ്യോഗിക വാര്‍ത്താകുറിപ്പ് പുറപ്പെടുവിച്ചു.

ഒമ്പതു വയസ്സുള്ള പയ്യന്‍ 18 കാരിയെ വിവാഹം ചെയ്യുന്ന വ്യത്യസ്തമായ പ്‌ളോട്ടായിരുന്നു ഉദ്ദേശിച്ചിരുന്നതെങ്കിലും കഥയിലെ ഈ പുതുമ നാട്ടുകാര്‍ക്ക് പിടിക്കാതെ പോകുകയായിരുന്നു. സീരിയലിന്റെ പേരില്‍ കഴിഞ്ഞമാസം ടെലിവിഷന്‍ ഓംബുഡ്‌സ്മാന് കിട്ടിയത് 140 പരാതികളായിരുന്നു. ഇതിന് പുറമേ ഒരുലക്ഷം പേര്‍ ഒപ്പുവെച്ച ഓണ്‍ലൈന്‍ പരാതി വേറെയും.

ഈ മാസം 22 മുതല്‍ പുതിയ തീരുമാനം നടപ്പിലാക്കാനാണ് നിര്‍ദേശമെങ്കിലും ഒക്‌ടോബര്‍ മുതല്‍ മാറ്റം കൊണ്ടുവരാനാണ് നീക്കം. എല്ലാറ്റിലും ആരോപണം ബാല വിവാഹം പ്രോത്സാഹിപ്പിക്കുന്നു എന്നായിരുന്നു. തുടര്‍ന്നാണ് വിവരസാങ്കേതിക പ്രക്ഷേപണ മന്ത്രാലയം പരമ്പര നിരോധിച്ചത്.