പിവി അന്‍വര്‍ എംഎല്‍എയുടെ ഹോട്ടല്‍ നിര്‍മ്മാണം : സ്‌റ്റേ നല്‍കിയ കളക്ടര്‍ക്ക് സ്ഥലം മാറ്റം

നിലമ്പൂര്‍ എംഎല്‍എ പിവി അന്‍വറിന്റെ പുതിയ റസ്‌റ്റോറന്റിനായി ആദിവാസികളുടെ കുടിവെള്ളം മുട്ടിച്ച് ചെക്ക് ഡാം നിര്‍മ്മിച്ചതിന്റെ വിവരങ്ങള്‍ പുറത്ത്‌. മലപ്പുറം ഊര്‍ണാട്ടേരി പഞ്ചായത്തിലാണ് എംഎല്‍എയുടെ റസ്‌റ്റോറന്റ് നിര്‍മ്മാണം. അനധികൃത നിര്‍മ്മാണം നടത്തിയതിന് മൈനിങ് ആന്‍ഡ് ജിയോളജി വകുപ്പ് എംഎല്‍എയ്‌ക്കെതിരെ നടപടിയെടുക്കണമെന്ന് കളക്ടര്‍ റിപ്പോര്‍ട്ട് നല്‍കിയിരുന്നു. നിര്‍മ്മാണ പ്രവര്‍ത്തനങ്ങള്‍ നിര്‍ത്താന്‍ സ്‌റ്റോപ്പ് മെമോയും നല്‍കി. ഈ രണ്ടു വിവരങ്ങളും മറച്ചു വെച്ചാണ് എംഎല്‍എ ഊര്‍ണാട്ടേരി പഞ്ചായത്തില്‍ നിന്ന് അനുമതി വാങ്ങിയത്.

റസ്റ്ററന്റിനായി സമര്‍പ്പിച്ച പ്ലാനില്‍ മഴവെള്ള കൊയ്ത്ത് സംഭരണിയുണ്ടായിരുന്നു. എന്നാല്‍ ഇതിനായി കാട്ടരുവി തടസ്സപ്പെടുത്തി അനധികൃതമായി ചെക്ക് ഡാം നിര്‍മ്മിക്കുകയാണ് ചെയ്തത്. ഇത് പൊളിച്ചു കളയാന്‍ ജില്ലാ കളക്ടര്‍ ഉത്തരവിട്ടു. എന്നാല്‍ കളക്ടറെ സ്ഥലം മാറ്റുകയാണുണ്ടായത്. ഇതിനു പുറമേ വനത്തിനുള്ളില്‍ 480 മീറ്റര്‍ നീളത്തില്‍ റോപ്‌വേയും നിര്‍മ്മിച്ചു.