മതംമാറി വീടുവിട്ട പി.ജി. വിദ്യാര്‍ഥിനിയെ ഹൈക്കോടതി മാതാപിതാക്കള്‍ക്കൊപ്പം വിട്ടയച്ചു

മതംമാറിയ പി.ജി. വിദ്യാര്‍ഥിനിയെ ഹൈക്കോടതി മാതാപിതാക്കള്‍ക്കൊപ്പം വിട്ടയച്ചു. കാസര്‍ഗോഡ് കരിപ്പോടി കണിയാംപാടിയില്‍ നിന്നു മകളെ കാണാനില്ലെന്നു കാട്ടി പിതാവ് സമര്‍പ്പിച്ച ഹേബിയസ് കോര്‍പ്പസ് ഹര്‍ജിയിലാണ് ഉത്തരവ്.

പെണ്‍കുട്ടിയെ അന്വേഷണത്തിനൊടുവില്‍ പോലീസ് കണ്ടെത്തിയെങ്കിലും വീട്ടിലേക്ക് മടങ്ങാന്‍ തയാറായിരുന്നില്ല. ഇതോടെ, ചില തീവ്രവാദി ഗ്രൂപ്പുകളുടെ പിന്‍ബലത്തോടെ മകളെ തടങ്കലില്‍ പാര്‍പ്പിച്ചിരിക്കുകയാണെന്ന് കാണിച്ച് പിതാവ് ഹൈക്കോടതിയെ സമീപിക്കുകയായിരുന്നു. പെണ്‍കുട്ടിയുടെ തിരോധാനവും തുടര്‍ന്നുണ്ടായ സംഭവവികാസങ്ങളും ഏറെ ചര്‍ച്ചയായിരുന്നു.

മതപഠനത്തിന് പോകുകയാണെന്നു കത്തെഴുതിവച്ച ശേഷം കഴിഞ്ഞമാസം പത്തിനാണു പെണ്‍കുട്ടി വീടുവിട്ടത്. മകള്‍ ഐ.എസില്‍ ചേര്‍ന്നതായി സംശയിച്ച് പിതാവ് പോലീസില്‍ പരാതി നല്‍കിയിരുന്നു. 27 ന് രാവിലെ കണ്ണൂര്‍ ബസ് സ്റ്റാന്‍ഡില്‍നിന്നാണു ബേക്കല്‍ സി.ഐ: വി.കെ. വിശ്വംഭരന്റെ നേതൃത്വത്തിലുള്ള പോലീസ് സംഘം പെണ്‍കുട്ടിയെ കണ്ടെത്തി.

അന്നു രാത്രി ഹൊസ്ദുര്‍ഗ് ജുഡീഷ്യല്‍ ഒന്നാം ക്ലാസ് (രണ്ട്) മജിസ്‌ട്രേറ്റിന്റെ വസതിയില്‍ ബേക്കല്‍ പോലീസ് ഹാജരാക്കിയിരുന്നു. തന്നെ ആരും തട്ടിക്കൊണ്ടുപോയില്ലെന്നും മതപഠനത്തിനായി സ്വന്തം ഇഷ്ടപ്രകാരം പോയതാണെന്നും പഠനം തുടരാനാണ് താല്‍പര്യമെന്നുമാണ് അന്ന് വിദ്യാര്‍ഥിനി മജിസ്‌ട്രേറ്റിനെ അറിയിച്ചത്. മാതാപിതാക്കളോടൊപ്പം പോകാന്‍ താല്‍പര്യമില്ലെന്നും അറിയിച്ചു. ഇതേത്തുടര്‍ന്ന് പരവനടുക്കം മഹിളാമന്ദിരത്തില്‍ പാര്‍പ്പിക്കാന്‍ കോടതി നിര്‍ദേശിക്കുകയായിരുന്നു.

ഹൈക്കോടതിയില്‍ പെണ്‍കുട്ടിയെ ഇന്നലെ ഹാജരാക്കി. പെണ്‍കുട്ടിയില്‍നിന്നു കോടതി സ്വകാര്യമായി കാര്യങ്ങള്‍ ചോദിച്ചറിഞ്ഞു. ഇതിന് ശേഷമാണ് വീട്ടുകാര്‍ക്കൊപ്പം വിട്ടയയ്ക്കാന്‍ ഉത്തരവിട്ടത്. തുടര്‍ന്ന് മാതാപിതാക്കള്‍ക്കും മറ്റ് കുടുംബാംഗങ്ങള്‍ക്കുമൊപ്പം പെണ്‍കുട്ടി സ്വദേശമായ ഉദുമയിലേക്ക് മടങ്ങി.