“നീലക്കുറിഞ്ഞി പൂത്തൂ…” ; മൂന്നാറിന് ഇത് ഉത്സവകാലം !

വിനോദസഞ്ചാരികളെ വരവേല്‍ക്കാന്‍ മൂന്നാര്‍ അണിഞ്ഞൊരുങ്ങി. ഇത് മൂന്നാറിന് പൂക്കാലം. കളഗാനത്തോടെ ഒഴുകുന്ന കാട്ടരുവിയും, മൊട്ടക്കുന്നിലെ കുറ്റിക്കാടുകലില്‍ നിന്നും തല ഉയര്‍ത്തി നോക്കുന്ന മാന്‍ കൂട്ടങ്ങളും സഞ്ചാരികളെ മാടി വിളിക്കുന്ന സുന്ദര കാലം. 12 വര്‍ഷത്തിലൊരിക്കല്‍ വിരുന്നെത്തുന്ന ആ സുന്ദരിയെ വരവേല്‍ക്കാന്‍ 'തെക്കിന്റെ കാശ്മീര്‍' ഒരുങ്ങി. 2018 ഓഗസ്റ്റ് മുതല്‍ ഒക്‌ടോബര്‍ വരെയാണ് ഇനി നീലക്കുറിഞ്ഞിക്കാലം.

ഇരവികുളം ദേശീയ ഉദ്യാനത്തിലെ രാജമലയിലാണ് നീലക്കുറിഞ്ഞി വസന്തം ഒരുക്കുന്നത്. അവസാനമായി 2006 ലാണ് നീലക്കുറിഞ്ഞി പൂത്തുലഞ്ഞത്. കണ്ണിനു കുളിരായി നീലച്ചമയം കോറിയിടാന്‍ നീലക്കുറിഞ്ഞി തളിരിടുമ്പോള്‍ അതിനായി മൂന്നാറും തകൃതിയായി ഒരുക്കങ്ങള്‍ തുടങ്ങുകയായ്. 2018 ലെ നീലക്കുറിഞ്ഞിക്കാലത്തെ വരവേല്‍ക്കാന്‍ വനം വകുപ്പ് ഒരുക്കങ്ങള്‍ തുടങ്ങി. അവസാന നീലക്കുറിഞ്ഞിക്കാലത്ത് അഞ്ചുലക്ഷം വിനോദ സഞ്ചാരികളാണ് മൂന്നാറിലെത്തിയത്. ഇതിന്റെ മൂന്നിരിട്ടി സഞ്ചാരികള്‍ ഇത്തവണ നീലക്കുറിഞ്ഞിയെ തേടി എത്തുമെന്നാണ് വനം വകുപ്പ് കണക്കുകുട്ടുന്നത്.