ജിഎസ്ടി വന്നതോടെ കുമരകം വിനോദസഞ്ചാരത്തിന് വന്‍ തിരിച്ചടി !

ജി.എസ്‌.ടി നടപ്പാക്കിയതോടെ ഹൗസ്‌ബോട്ട്‌ മേഖല പ്രതിസന്ധിയിലെന്ന് റിപ്പോര്‍ട്ടുകള്‍. പുതിയ നികുതിസമ്പ്രദായം വന്നതോടെ 18 മുതല്‍ 28 ശതമാനം വരെയാണ്‌ ഹൗസ്‌ ബോട്ടുകള്‍ക്ക്‌ നികുതി. ഇതോടെ ജില്ലയുടെ പ്രധാന വിനോദ സഞ്ചാര കേന്ദ്രമായ കുമരത്തിനു ജി.എസ്‌.ടി. വന്‍ തിരിച്ചടിയായിരിക്കുകയാണ്‌. നികുതി പരിഷ്‌കാരം പ്രാബല്യത്തിലായതോടെ ചെലവിനുള്ള പണം പോലും ലഭിക്കുന്നില്ലെന്നു ഹൗസ്‌ബോട്ട്‌ ഉടമകള്‍ പറയുന്നു.

ഹൗസ്‌ബോട്ടുകള്‍ക്ക്‌ കോമ്പൗണ്ടിങ്‌ നികുതിയാണ്‌ ഇതുവരെ ഈടാക്കിയിരുന്നത്‌. ഒറ്റമുറിയുള്ള ഒരു ഹൗസ്‌ബോട്ടിന്‌ പ്രതിവര്‍ഷം 15,000 രൂപയും, രണ്ടു മുറിയുള്ളതിന്‌ 25,000 രൂപയുമായിരുന്നു നികുതി. ഇതാണ്‌ ജി.എസ്‌.ടി നടപ്പാക്കിയതോടെ ഓരോ യാത്രക്കും 18 ശതമാനം മുതല്‍ 28 ശതമാനം വരെ നികുതി എന്നതായി മാറ്റിയത്‌. പുതിയ നികുതികൂടി വിനോദസഞ്ചാരികളില്‍ നിന്നും ഈടാക്കിയാല്‍ യാത്രക്ക്‌ ആളെ കിട്ടാന്‍ ബുദ്ധിമുട്ടാകും. കോട്ടയത്തും ആലപ്പുഴയിലുമായി 1500ലധികം ഹൗസ്‌ബോട്ടുകളുമാണ്‌ ഉള്ളത്‌.

ഹൗസ്‌ബോട്ട്‌ വ്യവസായം സ്‌തംഭിച്ചാല്‍ അത്‌ ആയിരക്കണക്കിന്‌ തൊഴിലാളികളെ പട്ടിണിയിലാക്കും. സാധാരണ മണ്‍സൂണ്‍ ടൂറിസത്തിന്റെ ഭാഗമായി ജൂണ്‍, ജൂലൈ മാസങ്ങളില്‍ സഞ്ചാരികള്‍ എത്തിയിരുന്നുവെങ്കിലും ഈ സീസണില്‍ സഞ്ചാരികള്‍ കുറവാണെന്നു ടൂര്‍ ഓപ്പറേറ്റര്‍മാര്‍ പറയുന്നു. നോട്ട്‌ പ്രതിസന്ധിയെത്തുടര്‍ന്നു കഴിഞ്ഞ സാമ്പത്തിക വര്‍ഷം ഹൗസ്‌ ബോട്ട്‌ മേഖലയില്‍ വന്‍ തിരിച്ചടിയുണ്ടായിരുന്നു.