രാജാക്കാടിന്റെ കുളിര് തേടി സഞ്ചാരികളുടെ ഒഴുക്ക്..!

ഈ മഴയില്‍ നനഞ്ഞ് കുളിക്കാന്‍ ഇഷ്ടമില്ലാത്തവര്‍ ആരും ഉണ്ടാവില്ല. ഇപ്പോള്‍ രാജാക്കാട്ടില്‍ ആ കുളിര് തേടി അങ്ങ് അറബ് രാജ്യങ്ങളില്‍ നിന്നുപോലും സഞ്ചാരികള്‍ ഒഴുകുന്നതായി റിപ്പോര്‍ട്ടുകള്‍. പ്രധാന വിനോദ സഞ്ചാരകേന്ദ്രമായ ശ്രീനാരായണപുരവും സഞ്ചാരികളെ കൊണ്ടുനിറഞ്ഞു. മഞ്ഞും തണുപ്പും ആസ്വദിക്കാനായി ഇത്തവണയും ആയിരക്കണക്കിന്‌ സഞ്ചാരികളാണ്‌ ജില്ലയിലേക്ക്‌ എത്തുന്നത്‌. മണല്‍ക്കാറ്റിന്റെ ചൂടില്‍നിന്നു ഹൈറേഞ്ചിന്റെ കുളിരുതേടിയെത്തുന്നവരുടേയും എണ്ണത്തില്‍ വന്‍ വര്‍ധനയുണ്ടായിട്ടുണ്ട്‌.

ആരെയും ആകര്‍ഷിക്കുന്ന അഞ്ച്‌ വെള്ളച്ചാട്ടങ്ങളും മലനിരകളുടെ വിദൂരകാഴ്‌ചകളും കൊണ്ട്‌ സമൃദ്ധമായ ശ്രീനാരായണപുരം റിപ്പിള്‍ വാട്ടര്‍ഫാള്‍സ്‌ കാണാനായി ദിവസേന നൂറുകണക്കിന്‌ സഞ്ചാരികളാണ്‌ എത്തുന്നത്‌. കുത്തിയൊഴുകിയെത്തുന്ന മുതിരപ്പുഴയാറിന്റെ തേക്കിന്‍കാനം മുതല്‍ ശ്രീനാരായണപുരം വരെയുള്ള പ്രദേശത്താണ്‌ അഞ്ചോളം വെള്ളച്ചാട്ടങ്ങള്‍. ഇനി ഒട്ടും അമാന്തിക്കേണ്ട വണ്ടി നേരെ രാജാക്കാട്ടേയ്ക്ക് വിട്ടോ...!