നടി ആക്രമിക്കപ്പെട്ട കേസ്‌ : ബി. സന്ധ്യ ഒറ്റയ്ക്ക് അന്വേഷിക്കേണ്ടെന്ന് ഡിജിപി സെന്‍കുമാര്‍

കൊച്ചിയില്‍നടിയെ ആക്രമിച്ച കേസില്‍ തുടരന്വേഷണം എഡിജിപി ബി സന്ധ്യ ഒറ്റയ്ക്ക് നടത്തേണ്ടെന്ന് ഡിജിപി ടി.പി സെന്‍കുമാര്‍. കേസിലെ അന്വേഷണം ശരിയായ രീതിയതിലല്ല പുരോഗമിക്കുന്നതെന്നും പ്രെഫഷണല്‍ അന്വേഷണം ആവശ്യമാണെന്നൂം കാണിച്ച് ഡിജിപി സര്‍ക്കുലര്‍ പുറത്തിറക്കി. കേസ് നിര്‍ണായകഘട്ടത്തിലെത്തി നില്‍ക്കെയാണ് ഡിജിപിയുടെ സര്‍ക്കുലര്‍ പുറത്ത് വന്നിരിക്കുന്നത്. കേസ് ഓരോ ദിവസവും കൂടുതല്‍ വിവാദങ്ങളിലേയ്ക്കു കടക്കുന്നതിനിടെയാണ് ഇന്ന് വിരമിക്കാനിരിക്കുന്ന സെന്‍കുമാര്‍ പുതിയ സര്‍ക്കുലര്‍ പുറത്തിറക്കിയത്.

ക്രൈം ബ്രാഞ്ച് ഐ.ജി ദിനേന്ദ്ര കശ്യാപിന്റെ നേതൃത്വത്തില്‍ അന്വേഷണ സംഘത്തെ ലോക്‌നാഥ് ബെഹ്‌റ ഡിജിപി ആയിരിക്കെയാണ് നിയമിച്ചത്. കേസില്‍ പള്‍സര്‍ സുനിയേയും മറ്റുള്ളവരെയും നേരത്തെ ഈ അന്വേഷണ സംഘമാണ് ചോദ്യം ചെയ്തത്. എന്നാല്‍ കഴിഞ്ഞ ദിവസം നടന്‍ ദിലീപിനേയും നാദിര്‍ഷായേയും ചോദ്യം ചെയ്തത് ബി.സന്ധ്യയുടെ നേതൃത്വത്തിലായിരുന്നു. ഇവരെ ചോദ്യം ചെയ്യുന്ന വിവരം അന്വേഷണ ഉദ്യോഗസ്ഥന്‍ അറിഞ്ഞിരുന്നുമില്ല. ഇത് ചൂണ്ടിക്കാട്ടിയാണ് ഡിജിപി യുടെ പുതിയ സര്‍ക്കുലര്‍ പുറത്തിറങ്ങിയത്. കേസിലെ പല വിവരങ്ങളും മാധ്യമങ്ങള്‍ക്ക് ചോര്‍ന്നു കിട്ടുന്നുണ്ടെന്നും ഡിജിപി സര്‍ക്കുലറില്‍ പറയുന്നു.