അവരുടെ ലക്ഷ്യം ദിലീപ്‌ മാത്രമല്ല രാമലീലയും ; ദിലീപിന് പിന്തുണയുമായി ടോമിച്ചന്‍ മുളകുപാടം

യുവനടി ആക്രമിക്കപ്പെട്ട കേസില്‍ നടന്‍ ദിലീപിന് പിന്തുണയുമായി നിര്‍മ്മാതാവ് മുളക്പാടം ടോമിച്ചനും. കുപ്രചരണങ്ങള്‍ ദിലീപിനെ മാത്രമല്ല താനും ദിലീപും ഒന്നിക്കുന്ന പുതിയ ചിത്രം രാമലീലയെ കൂടി തകര്‍ക്കാനാണ് ശ്രമിക്കുന്നതെന്ന് ടോമിച്ചന്‍ മുളകുപാടം ഫേസ്ബുക്കിൽ വ്യക്തമാക്കുന്നു.

വളരെയേറെ വേദനയോടെയാണ് ഇതെഴുതുന്നത്. വളരെയേറെ നാളുകളായി പരിചയമുള്ള ദിലീപ് എന്ന നടനെതിരെയും ഞങ്ങൾ ഒരുമിക്കുന്ന രാമലീല എന്ന ചിത്രത്തിനെതിരെയും നടക്കുന്ന പ്രവർത്തനങ്ങൾ വേദനാജനകമാണ്. രാമലീലയുടെ റിലീസ്‌ ഡേറ്റ്‌ പ്രഖ്യാപിച്ചതിനുശേഷമാണ്‌ കുതന്ത്രങ്ങൾ മെനയുന്നവർ വീണ്ടും സജീവമായതെന്നതിനാൽ ഒന്നുറപ്പിക്കാം,അവരുടെ ലക്ഷ്യം ദിലീപ്‌ മാത്രമല്ല രാമലീലയും കൂടിയാണെന്ന് വ്യക്തം.

നൂറുക്കണക്കിന് ആളുകളുടെ സ്വപ്നവും പ്രയത്നങ്ങളും രാമലീല എന്ന ചിത്രമായി തീയറ്ററുകളിൽ എത്തിക്കാനുള്ള ശ്രമത്തിലാണ് ഞാനടക്കമുള്ളവർ. നല്ലൊരു മുതൽമുടക്കിൽ അരുൺ ഗോപിയെന്ന നവാഗത സംവിധായകന്റെ കൂടി ഒരു സ്വപ്നമാണിത്. രാമലീലക്ക് പിന്നിൽ പ്രവർത്തിക്കുന്ന ഓരോരുത്തർക്കും വേദനയുളവാക്കുന്ന ഒരു കാര്യമാണ് ചിത്രത്തെ തകർക്കാൻ ചിലർ നടത്തുന്ന നാണംകെട്ട പ്രവൃത്തികൾ. അതിലേറെ വേദനയേകുന്ന ഒന്നാണ് ദിലീപ് എന്ന നടനെതിരെ നടക്കുന്ന ഗൂഢാലോചനകൾ. ആ നടനെ തകർക്കാൻ ശ്രമിക്കുന്ന ഓരോരുത്തനും ഒന്നോർക്കുക. അദ്ദേഹം ജനപ്രിയനായത് കഠിനാധ്വാനവും പ്രേക്ഷകപിന്തുണയും കൊണ്ടാണ്. അതിനിയും തുടരുക തന്നെ ചെയ്യും.