ഉമ്മന്‍ചാണ്ടിയുടെ മെട്രോയാത്ര : കെഎംആര്‍എല്‍ റിപ്പോര്‍ട്ട് തേടി

ഉമ്മന്‍ ചാണ്ടിയുടെ മെട്രോയാത്രയില്‍ കെഎംആര്‍എല്‍ റിപ്പോര്‍ട്ട് തേടി. മെട്രോയുടെ നയങ്ങള്‍ക്കെതിരായ പ്രവര്‍ത്തനങ്ങള്‍ യാത്രയിലുണ്ടായതിന്റെ അടിസ്ഥാനത്തിലാണ് റിപ്പോര്‍ട്ട് തേടിയത്. അണികളുടെ തള്ളിക്കയറ്റം മറ്റ് യാത്രക്കാര്‍ക്ക് ഏറെ ബുദ്ധിമുട്ടുണ്ടാക്കി. പ്രവര്‍ത്തകര്‍ മുദ്രാവാക്യം വിളിച്ചതും ചട്ടലംഘനമാണ്. മെട്രോ ചട്ടം അനുസരിച്ച് ട്രെയിനിലും സ്റ്റേഷന്‍ പരിസരത്തും പ്രകടനം നടത്തുന്നത് ആയിരം രൂപ പിഴയും ആറ് മാസം വരെ തടവ് ശിക്ഷയും ലഭിക്കാവുന്ന കുറ്റമാണ്.

മൂന്ന് ദിവസത്തിനുള്ളില്‍ റിപ്പോര്‍ട്ട് സമര്‍പ്പിക്കണം. വീഡിയോ ദൃശ്യങ്ങള്‍ പരിശോധിച്ച ശേഷമാണ് ചുമതലയുള്ളവര്‍ റിപ്പോര്‍ട്ട് നല്‍കുക. ഇതിന്റെ അടിസ്ഥാനത്തില്‍നടപടികള്‍ തീരുമാനിക്കുമെന്ന് അധികൃതര്‍ പറഞ്ഞു. മെട്രോ ഉദ്ഘാടനച്ചടങ്ങിലും ആദ്യയാത്രയും രാഷ്ട്രീയവത്കരിച്ചതില്‍ പ്രതിഷേധിച്ചായിരുന്നു ഈ മെട്രോ യാത്ര. ഉമ്മന്‍ചാണ്ടിയുടെ നേതൃത്വത്തില്‍ ആലുവയില്‍ നിന്നും പാലാരിവട്ടം വരെയായിരുന്നു ജനകീയ യാത്ര.