പ്രശ്‌നക്കാരന്‍ കോഹ് ലിയോ…? രാജിവയ്‌ക്കാനുണ്ടായ കാരണം വെളിപ്പെടുത്തി കുംബ്ലെ

ക്യാപ്‌റ്റന്‍ വിരാട് കോഹ്‌ലിയുമായുള്ള കടുത്ത അഭിപ്രായ വ്യത്യാസത്തെ തുടർന്നാണ് താൻ പരിശീലകസ്ഥാനം രാജിവച്ചതെന്ന് അനിൽ കുംബ്ലെ. ബിസിസിഐക്ക് നല്‍കിയ രാജിക്കത്തിലാണ് ഇക്കാര്യം കുംബ്ലെ വ്യക്തമാക്കിയിരിക്കുന്നത്. ടീം ഇന്ത്യയുടെ പരിശീലകനാക്കിയ ബിസിസിഐയോടും ക്രിക്കറ്റ് ഉപദേശക സമിതിയോടും നന്ദി പറഞ്ഞാണ് കുംബ്ലെ തന്റെ രാജിക്കത്ത് ആരംഭിക്കുന്നത്.

വിരാട് കോഹ്‌ലിയുടെ താല്‍പ്പര്യങ്ങളെ താന്‍ അംഗീകരിച്ചിരുന്നു. എന്നാല്‍, അദ്ദേഹത്തിന് ഞാന്‍ തുടരുന്നത് ഇഷ്‌ടമല്ലെന്ന് കഴിഞ്ഞ ദിവസം ബിസിസിഐ തന്നെ അറിയിച്ചു. ടീം സ്വന്തമാക്കി നേട്ടങ്ങളില്‍ കോഹ്‌ലിയോടും താരങ്ങളോടും നന്ദിയുണ്ട്. രാജിവച്ചൊഴിയാന്‍ ഉചിതമായ സമയം ഇതാണെന്നും കുംബ്ലെയുടെ രാജിക്കത്തില്‍ വ്യക്തമാക്കുന്നു.

ടീമിലെ പ്രശ്നങ്ങള്‍ പരിഹരിച്ചുവെന്നും വെസ്‌റ്റ് ഇന്‍ഡീസ് പരമ്പരയ്ക്കുള്ള ടീമിന്‍റെ കോച്ചായി കുംബ്ലെ തുടരുമെന്നുമുള്ള റിപ്പോര്‍ട്ടുകള്‍ വരുന്നതിനിടെയാണ് അപ്രതീക്ഷിതമായി കുംബ്ലെ രാജി നല്‍കിയത്. സച്ചിന്‍ തെണ്ടുല്‍ക്കര്‍, സൗരവ് ഗാംഗുലി, വിവി എസ് ലക്ഷ്മണ്‍ എന്നിവര്‍ ഉള്‍പ്പെട്ട ക്രിക്കറ്റ് അഡ്വൈസറി കമ്മിറ്റിയുമായുള്ള കൂടിക്കാഴ്ചയില്‍ താനും കുംബ്ലെയുമായി ഇനി ഒരുമിച്ച് പോകില്ലെന്ന് വിരാട് കോഹ്‌ലി സംശയമേതുമില്ലാതെ അറിയിച്ചിരുന്നു.

ചാമ്പ്യന്‍സ് ട്രോഫി കാലയളവില്‍ തന്നെ കുംബ്ലെയും കോഹ്‌ലിയും തമ്മിലുള്ള ആശയവിനിമയം പൂര്‍ണമായും അവസാനിച്ചിരുന്നു. ബൗളര്‍മാര്‍ക്ക് മാത്രം പരിശീലനം നല്‍കുന്ന സാഹചര്യത്തിലേക്ക് കുംബ്ലെ തന്‍റെ സേവനം ചുരുക്കുകയും ചെയ്തു. കോച്ച് എന്ന നിലയില്‍ കുംബ്ലെയുടെ പ്രകടനം പൂര്‍ണ വിജയമായിരുന്നു. കുംബ്ലെയുടെ പരിശീലനത്തിന്‍‌കീഴില്‍ കളിച്ച 17 ടെസ്റ്റുകളില്‍ ഇന്ത്യ ഒന്നില്‍ മാത്രമാണ് പരാജയപ്പെട്ടത്. 12 ടെസ്റ്റുകള്‍ വിജയിച്ചു. ജൂണ്‍ 23ന് ആരംഭിക്കുന്ന വെസ്റ്റിന്‍ഡീസ് പര്യടനത്തില്‍ അഞ്ച് ഏകദിന മത്സരങ്ങളാണുള്ളത്. ഒരു ട്വന്‍റി20 മത്സരവും ഉണ്ടാകും. ജൂലൈ ഒമ്പതിന് പര്യടനം അവസാനിക്കും. കുംബ്ലെയ്ക്ക് പകരക്കാരനെ കണ്ടെത്തുക എന്നതാണ് സച്ചിനും ഗാംഗുലിക്കും ലക്ഷ്മണിനും മുമ്പിലുള്ള വലിയ വെല്ലുവിളി.