പാക് ആകാശത്ത് പിറന്ന മലയാളി കുഞ്ഞ്‌ ; കുഞ്ഞിന് ആജീവനാന്ത വിമാനയാത്ര അനുവദിച്ച് വിമാനകമ്പനിയും…!

വിമാനയാത്രയില്‍ മലയാളി യുവതി പ്രസവിച്ചു. ഗള്‍ഫില്‍ നിന്നും നാട്ടിലേക്ക് വന്ന മലയാളി യുവതി കുഞ്ഞിന് ജന്മം നല്‍കിയത് പാകിസ്താന്റെ ആകാശത്ത് വെച്ച്‌. തുടര്‍ന്ന് വിമാനം മുംബൈയിലിറക്കി കുഞ്ഞിനെയും അമ്മയെയും ആംബുലന്‍സില്‍ ആശുപത്രിയിലേക്കു മാറ്റി. വിമാനത്തില്‍ പ്രസവിച്ച യുവതിയെ പരിചരിച്ചതും ഒരു മലയാളി യുവതിയാണ്.

ജെറ്റ് എയര്‍വേയ്‌സ് 569 വിമാനത്തില്‍ യാത്രയ്ക്കിടയില്‍ യുവതിക്ക് പ്രസവവേദന അനുഭവപ്പെടുകയായിരുന്നു. തുടര്‍ന്ന് വിമാനത്തില്‍ ഡോക്ടര്‍മാര്‍ ആരെങ്കിലുമുണ്ടോയെന്ന് അന്വേഷിക്കുമ്പോഴാണ് കേരളത്തിലേക്ക് വരികയായിരുന്ന മലയാളി നഴ്‌സ് സഹായഹസ്തവുമായി മുന്നോട്ടുവന്നത്. തുടര്‍ന്ന് നഴ്‌സിന്റെയും മറ്റു ജീവനക്കാരുടെയും സഹായത്തോടെയാണ് യുവതി കുഞ്ഞിന് ജന്മം നല്‍കിയത്. വിമാന യാത്രക്കിടയില്‍ ഉണ്ടാകുന്ന കുഞ്ഞുങ്ങള്‍ക്ക് വിമാനക്കമ്പനികള്‍ ആജീവനാന്തം സൗജന്യയാത്ര അനുവദിക്കാറുണ്ട്. ഈ കുഞ്ഞിനും വിമാനക്കമ്പനി ആജീവനാന്തം സൗജന്യയാത്ര അനുവദിച്ചു.

ദമാമില്‍ നിന്ന് കൊച്ചിലേക്കു വരികയായിരുന്ന വിമാനത്തിലാണ് യുവതി കുഞ്ഞിനു ജന്മം നല്‍കിയത്. പാകിസ്താനിലെ കറാച്ചിക്കു മുകളിലുടെ പറക്കുമ്പോഴാണ് പ്രസവമെന്ന് ജീവനക്കാര്‍ പറഞ്ഞു. വിമാനത്തില്‍ തുടര്‍ന്നുള്ള യാത്ര സുരക്ഷിതമല്ലാത്തതു കൊണ്ടാണ് ആശുപത്രിയിലേക്കു മാറ്റിയത്. കുഞ്ഞും അമ്മയും സുരക്ഷിതരാണെന്ന് അധികൃതര്‍ അറിയിച്ചു.